$ 499.65 € 582.89 ₽ 6.47

23 жылда үй бағасы 21 есе қымбаттады – депутат Базарбек дабыл қақты

Редакция
09 сәуір 2025 06:31 1786
23 жылда үй бағасы 21 есе қымбаттады – депутат Базарбек дабыл қақты Сурет авторы: NUR.KZ/Владимир Третьяков

Мәжілісмен Бақытжан Базарбек құрылыс компанияларына ҚҚС жеңілдігін жоюды қолдайтынын мәлімдеді. Оның айтуынша, 23 жыл бойы мемлекет құрылыс компанияларына салық жеңілдіктерін ұсынып келгенімен, баспана бағасы халық үшін қолжетімді бола қойған жоқ.

«23 жыл бойы құрылыс компанияларын қолдап келеміз, оларды ҚҚС-тан босаттық, бірақ нәтижесінде үй бағасы 21 есе өсті. Кәдімгі халық үшін үй алу мүмкін емес», – деді депутат сәрсенбі күні Мәжілістің жалпы отырысында.

Базарбектің сөзінше, 2001 жылы 1 шаршы метрдің орташа бағасы 23 637 теңге болса, 2023 жылы – 494 мың теңгеге дейін жеткен. Ол бұл өсімді «ҚҚС жеңілдіктері арқылы лобби жасау» деп бағалады. Депутат осы жеңілдіктің арқасында кейбір құрылысшы Forbes тізіміне енгенін, капиталын шетелге жылыстатқанын, ал кейбіріне ҚҚС-тан босату жеткіліксіз болып, үлескерлерді алдап соққанын атап өтті.

Өз кезегінде вице-премьер, ұлттық экономика министрі Серік Жұманғарин ҚҚС-қа қатысты өзгеріс жаңа Салық кодексі жобасына енгізілгенін растады.

«Бұл жеңілдіктердің пайдасы болмағанын біз де мойындаймыз. Кейбір құрылыс компаниялары салықтан жалтарып келді. Қазір салық комитеті алғаш болып соларға ескерту жасап, тиісті салықтарды төлетті. Бұдан былай қатаң бақылау болады», – деді ол.

Соңғы жаңалықтар