2030 жылға қарай құпия сөз атаулы қалмайды: Еурокомиссия суперкомпьютерлердің қаупі туралы шұғыл ескерту жасады

Еурокомиссия суперкомпьютерлердің, әсіресе кванттық технологиялардың қарқынды дамуына байланысты әлемдегі барлық құпия сөздердің бұзылу қаупі бар екенін мәлімдеді. 

Bild басылымының хабарлауынша, Еуропалық технологиялық егемендік және деректер қауіпсіздігі жөніндегі комиссар Хенна Вирккунен қазіргі қорғаныс жүйелері небәрі төрт жылдан кейін өз күшін жоюы мүмкін екенін ескертті. Негізгі қауіп кванттық компьютерлерден туындап отыр: олар бүгінгі таңдағы ең күрделі шифрлау жүйелерін бірнеше секунд ішінде бұзуға қабілетті.

Бұл қауіптің салдары өте ауыр болуы мүмкін, себебі жеке мессенджерлердегі хат-хабарлар, банктік деректер, корпоративтік ақпараттар мен мемлекеттік құпия құжаттар толықтай қорғаусыз қалуы ықтимал. Еуропалық Одақ сарапшылары бұл киберқауіпке жалғыз тиімді жауап ретінде посткванттық криптографияны енгізуді ұсынып отыр. ЕО-ның жол картасына сәйкес, 2030 жылға қарай барлық стратегиялық маңызды жүйелерді жаңа буынды шифрлау әдістеріне көшіру жоспарлануда. Дегенмен бұл технологиялық көшудің нақты мерзімі мен ауқымын әр мемлекет дербес шешетін болады.