2027 жылы қазақстандықтарды қажылыққа апару құқығына кімдер ие болды

Қазақстан мұсылмандары діни басқармасы (ҚМДБ) 2027 жылғы қажылық маусымын ұйымдастыратын компанияларды іріктеу қорытындысын жариялап, үлкен өзгерісті мәлімдеді. Былтыр қажылық сапарларын 14 туроператор ұйымдастырған болса, бұл жолы арнайы конкурстан кейін тек 4 компания ғана ресми рұқсат алды.

ҚМДБ жанынан құрылған комиссияның шешімімен 2027 жылғы қажылыққа отандық мына компаниялар лайықты деп танылды:

• «Атлас Туризм» ЖШС

• «Нұрхан Тревел» ЖШС

• «Тауаф Тревел» ЖШС

• «Хикмет Тревел» ЖШС

Іріктеу барысында үміткерлердің жыл бойғы қызмет көрсеткіштері, оң тәжірибесі, тиісті лицензиялары және «Туристік Қамқор» корпоративті қоры арқылы расталған туркодтары мұқият тексерілді. Сонымен қатар, Сауд Арабиясы Корольдігінің қажылықты ұйымдастырушыларға қоятын қатаң талаптары да ескерілген.

Дегенмен негізгі конкурстан өте алмаған туроператорлар үшін сапарды ұйымдастыру мүмкіндігі толық жабылған жоқ. Дін басқармасының түсіндіруінше, ережеден тыс қалған фирмалар заңды тәртіпте жоғарыда аталған 4 туроператордың бірімен субагенттік келісімшарт жасасу арқылы қажылық қызметін ұсына алады.