2027 жылға дейін Қазақстан халқының 100 пайызы интернетпен қамтылады – вице-премьер

Бұл туралы Үкімет отырысында Премьер-министрдің орынбасары – Жасанды интеллект және цифрлық даму министрі Жаслан Мадиев мәлімдеді.

Оның айтуынша, соңғы үш жылда телекоммуникация саласына 1 трлн теңгеден астам инвестиция салынған. Соның нәтижесінде еліміздегі интернеттің орташа жылдамдығы 94 Мбит/с деңгейіне жетті.

"Сала дамуы 2024–2027 жылдарға арналған «Қолжетімді интернет» ұлттық жобасы аясында жүзеге асырылып жатыр. 2027 жылдың соңына дейін халықтың 100 пайызы интернетпен қамтылады деп жоспарланып отыр. Интернет жылдамдығы 100 мегабиттен асады, ал талшықты-оптикалық байланыс желісі ауылдық елді мекендердің 90 пайызына дейін жеткізіледі", – деді Жаслан Мадиев.

Вице-премьердің айтуынша, 2026 жылдың соңына дейін тағы 3 мың ауылға оптикалық желі тартылады. Осылайша, 2027 жылға қарай елдімекендердің 90 пайызы талшықты байланыспен қамтамасыз етіледі. Бұл бағыттағы жалпы инвестиция көлемі – 323 млрд теңге. Ал қалған 10 пайыз шағын ауылдарға интернет спутник арқылы жеткізілмек.

Жаслан Мадиевтің мәліметінше, мобильді байланыс желісінің де қамтылу ауқымы артады. Мәселен, 4G технологиясы елдегі елдімекендердің 92 пайызына таралады.