2027 жылдан бастап несие алу қиындауы мүмкін

Қазақстанда 2027 жылдан бастап азаматтардың жалпы қарыз көлеміне шектеу енгізілуі мүмкін. Мұндай ұсынысты Қазақстан Ұлттық банкі көтерді.

Жаңа ережеге сәйкес, банктер несие беру кезінде тек ай сайынғы төлемді ғана емес, қарыз алушының барлық міндеттемелерін ескеретін болады. Оның ішінде ипотека, автонесие, бөліп төлеу және микрокредиттер қамтылады.

Ұсыныс бойынша, азаматтың жалпы қарызы оның жылдық табысының сегіз есесінен аспауы тиіс. Орташа жалақы алатын адам үшін бұл шамамен 44 млн теңге, ал медианалық табыс бойынша шамамен 32 млн теңгені құрайды.

Бұл шектеу ең алдымен қарыз жүктемесі жоғары азаматтарға әсер етеді. Егер адамның бірнеше несиесі болса, жаңа қарыз алу қиындай түседі.

Осылайша банктер қарыз алушының тек төлем қабілетін ғана емес, жалпы қаржылық жүктемесін де жан-жақты бағалайтын болады.