2026 жылы зейнетақы мен жәрдемақыларға рекордтық 6,8 трлн теңге бөлінеді

2026 жылы Қазақстанда зейнетақы мен мемлекеттік жәрдемақыларды төлеуге шамамен 6,8 трлн теңге бөлу жоспарланып отыр. Бұл көрсеткіш 2025 жылмен салыстырғанда 15,1 пайызға жоғары. Ақпаратты ҚР Еңбек және халықты әлеуметтік қорғау министрлігі таратты.

Ведомствоның хабарлауынша, зейнетақы төлемдеріне 4,89 трлн теңге қарастырылған. Аталған қаражатты ел бойынша шамамен 2,6 млн зейнеткер алады. Ал мемлекеттік жәрдемақыларға 1,893 трлн теңге бөлініп, бұл төлемдер 2,3 млн-ға жуық азаматқа бағытталады.

Жалпы әлеуметтік шығындар ішкі жалпы өнімнің 3,7 пайызына тең болып, республикалық бюджет шығыстарының шамамен төрттен бірін құрайды. Сонымен қатар бөлінетін қаражаттың бір бөлігі мүмкіндігі шектеулі жандарды қолдауға, оңалту бағдарламаларына және протездік-ортопедиялық көмек көрсетуге жұмсалады.

Айта кетейік, 2025 жылы зейнетақы мен жәрдемақыларға 5,858 трлн теңге бөлініп, әлеуметтік төлемдерді 4,6 млн адам алған еді.