2026 жылы Қазақстанда балаларға Ұлттық қордан қанша қаражат төленеді

Қазақстан Ұлттық банкінің төрағасы Тимур Сүлейменов «Ұлттық қор – балаларға» бағдарламасы аясында 2025 жылға арналған төлемдердің шамамен қандай көлемде болатынын айтты. Оның сөзінше, үшінші рет жүргізілетін төлемдерді 2026 жылғы 1 ақпаннан кешіктірмей аудару жоспарланып отыр.

Қазіргі уақытта нақты сома әлі бекітілмеген. Дегенмен, Ұлттық банк төрағасының айтуынша, төлем мөлшері өткен жылғы деңгеймен шамалас болуы мүмкін. Күтілетін сома – шамамен 130 АҚШ доллары, бұл 65 мың теңгеден сәл асады.

2025 жылға арналған төлемді 2025 жылғы 31 желтоқсанға дейін 18 жасқа толмаған, Қазақстан Республикасының барлық кәмелетке толмаған азаматтары алады.

Сондай-ақ Тимур Сүлейменов 2025 жылы Ұлттық қор активтерін басқарудан түскен табыс 8,7 млрд долларды құрағанын хабарлады. Бұл долларлық мәнде 15% жылдық табыстылыққа тең.

 «Бұл көрсеткіштердің екеуі де рекордтық. Ұлттық қорды басқару тарихында мұндай нәтижелер бұрын-соңды болған емес. Осы табыстың арқасында ірі трансферттер мен қаражат алуына қарамастан, қордың көлемі артты», – деді ол брифинг барысында.

Еске салсақ, 2024 жылы қазақстандық балаларға 100,52 доллар, ал 2025 жылы 129,38 доллар көлемінде төлем аударылған болатын. Жыл сайынғы төлем мөлшері Ұлттық қордың валюталық активтеріне және инвестициялық табысына тікелей байланысты.

Бағдарлама аясында жиналған қаражатты кәмелет жасына толғаннан кейін ғана, әрі білім алу немесе тұрғын үй жағдайын жақсарту мақсатында пайдалануға болады. Арнайы шоттардағы ақшаны мерзімінен бұрын шешіп алу қарастырылмаған.