2026 жылы Астанада Бесінші дүниежүзілік кадеттер ойыны өтеді

2026 жылы Астана қаласы Халықаралық әскери спорт кеңесінің (CISM) Бесінші дүниежүзілік кадеттер ойындарын қабылдайтын болады. Бұл шешім ұйым президенті Ролим Гоместің төрағалығымен Абу-Дабиде өткен Әскери спорт кеңесінің әлемдік симпозиумында қабылданды. Бұл жөнінде Қорғаныс министрлігі хабарлады.

Қазақстанның бұл ауқымды жарысты өткізуге дайындығы туралы Қорғаныс министрлігі Спорт комитетінің төрағасы, полковник Арман Әбеуов CISM Директорлар кеңесінің 15 елден келген өкілдері алдында баяндама жасап, еліміздің инфрақұрылымдық және ұйымдастырушылық әлеуетін таныстырды. Кеңес мүшелері Қазақстанның спорттық инфрақұрылымын жоғары бағалап, ойындарды өткізуге келісім берді.

Кадеттер ойындарының бағдарламасына бес спорт түрі кіреді:

• бокс,

• қазақ күресі,

• жеңіл атлетика,

• жүзу,

• шағын футбол.

Жарысқа әлемнің түкпір-түкпірінен үздік курсанттар мен әскери оқу орындарының өкілдері қатысады.

Ұйымдастырушылардың айтуынша, бұл ойындар болашақ офицерлер арасындағы достық пен ынтымақтастықты нығайтуға, тәжірибе алмасуға және патриоттық әрі спорттық құндылықтарды дәріптеуге бағытталған.

Қазақстан үшін мұндай халықаралық деңгейдегі жастар турнирін өткізу – ұлттық әскери-спорттық жүйенің дамуының айқын көрсеткіші.

Қазіргі таңда елімізде Қорғаныс министрлігі, Ұлттық ұлан, Төтенше жағдайлар министрлігі және Шекара қызметі қарамағындағы алты әскери жоғары оқу орны мен Қорғаныс министрлігінің әскери-спорт колледжі жұмыс істейді.

Айта кетсек, бұған дейін Дүниежүзілік кадеттер ойындары:

• 2010 жылы – Анкарада (Түркия),

• 2014 жылы – Салинас/Китода (Эквадор),

• 2022 жылы – Санкт-Петербургте (Ресей),

• 2024 жылы – Каракаста (Венесуэла) өткен болатын.