2026 жылдан бастап зейнетақы жинағын жеке компанияларға толық беруге болады: не білу керек?

Еңбек және халықты әлеуметтік қорғау министрлігі зейнетақы жинақтарына мемлекеттік кепілдіктен бас тарту мәселесіне қатысты түсініктеме берді. Келесі жылдан бастап жеке инвестициялық портфельді басқарушылар (ЖИПБ) өздерінің меншікті капиталы есебінен инфляциялық шығындарды жабуға міндеттеледі.

Мемлекеттік кепілдік күшін жойғаннан кейін, салымшылар өз қаражатын жеке компанияларға толық көлемде сеніп тапсыра алады. Ведомство өкілдерінің айтуынша, бюджет қаражаты жеке компаниялардың инвестициялық шешімдерінің нәтижесін жабуға жұмсалмауы керек. Осыған байланысты, жеке басқарушыларға қатаң талаптар қойылады. Атап айтқанда, компанияның капиталы 1,9 миллиард теңгеден (немесе 440 мың АЕК) кем болмауы және тиісті тәжірибесі болуы шарт.

Ал жинақтарын консервативті тәсілмен сақтағысы келетін азаматтар үшін басты оператор ретінде Ұлттық банк қалады. Әлеуметтік кодекске сәйкес, Ұлттық банк зейнетақы активтерінің сақталуын қамтамасыз етуге және оның табыстылығын инфляция деңгейінен 1%-ға жоғары деңгейде ұстап тұруға міндетті.

Стратегиялық жоспар бойынша, Ұлттық банк инвестициялық портфельді әртараптандыруды жалғастырады және шетелдік валюталық активтердің үлесін 30%-дан кем емес деңгейде сақтайды. Айта кетейік, 2026 жылдың қыркүйегінен бастап қазақстандықтар зейнетақы жинақтарының 100%-ына дейін жеке басқарушы компанияларға аудара алады.