200 млн теңге жымқырған: «ҚазАвтоЖолдың» бұрынғы басшысы 8 жылға сотталды

«ҚазАвтоЖол» ҰК» АҚ-ның бұрынғы төрағасы Асқар Мұратұлы бюджет қаражатын жымқыру ісі бойынша кінәлі деп танылып, 8 жылға бас бостандығынан айырылды. Бұл туралы елордалық соттың баспасөз қызметі хабарлады.

Сот материалдарына сәйкес, 2019 жылы «ҚазАвтоЖол» облыстық филиалы мен «Асыл-ЖАС» ЖШС басшысы Қазбек Жұмагелдиев Есіл өзені арқылы өтетін көпірді жөндеуге 2,2 млрд теңгеге келісімшарт жасасқан. Ол кезде Мұратұлы облыс әкімінің орынбасары қызметін атқарып, көпір қозғалысына қатысты мәселелерден хабардар болған.

2021 жылы Мұратұлы «ҚазАвтоЖол» басшысы қызметіне ауысқан соң, компания «Асыл-ЖАС» ЖШС-мен келісімшартты бұзған. Алайда бір айдан кейін Мұратұлы Жұмагелдиевпен кездесу өткізіп, жаңа келісімшарт жасауға ұсыныс білдірген.

Сондай-ақ Мұратұлы республикалық маңызы бар «Жақсы – Есіл – Бузулук» жолын жөндеу және көпір салу бойынша 2,2 млрд теңге көлемінде консорциуммен бір көзден сатып алу туралы заңсыз бұйрық шығарған.

2021 жылдың желтоқсанында «Асыл-ЖАС» ЖШС-нің есепшотына 200 млн теңге көлемінде аванс түскен, Мұратұлы мен Жұмагелдиев бұл қаражатты жымқырылған. Сотта екеуінің 2000-жылдардан бері таныс екені анықталды.

Сот үкімі бойынша Асқар Мұратұлы мен Қазбек Жұмагелдиев 8 жылға бас бостандығынан айырылды. Мұратұлыға мемлекеттік және квазимемлекеттік сектордағы лауазымдарды өмір бойы атқаруға тыйым салынды, ал Жұмагелдиевке 10 жыл бойы қаржылық және коммерциялық ұйымдарда басшылық қызмет атқаруға тыйым салынды.

Үкім әлі заңды күшіне енген жоқ.