200 000 доллар: Рыбакина мен Фритц Индиан-Уэллстегі турнирде жеңіске жетті

Қазақстандық теннис жұлдызы Елена Рыбакина америкалық Тейлор Фритцпен жұптасып, Калифорнияның Индиан-Уэллс қаласында өткен Эйзенхауэр кубогында (The Eisenhower Cup) топ жарды. Олар турнирдің бас жүлдесі - 200 000 долларды иеленді.

Эйзенхауэр кубогы - Индиан-Уэллстегі негізгі жарыс алдында өтетін дәстүрлі қайырымдылық турнирі. Мұнда әлемнің ең үздік 8 аралас жұбы 10 ұпайға дейінгі «супертайбрейк» жүйесі бойынша бақ сынайды. Жеңімпаз жұп бүкіл жүлде қорын (200 000$) қанжығасына байлайды.

Рыбакина мен Фритц дуэті турнир барысында керемет ойын көрсетіп, өткен жылғы чемпиондық атағын сәтті қорғап қалды:

• Ширек финалда: Ига Свентек пен Кристиан Руудты 10:5 есебімен қапы қалдырды.

• Жартылай финалда: Анисимова мен Тьен жұбын сенімді жеңді.

• Финалда: Тағы бір америкалық жұп - Аманда Анисимова мен Лернер Тьенді 10:7 есебімен жеңіп, жеңімпаз атанды.

Турнирге тағы бір қазақстандық теннисші Александр Бублик те қатысты. Ол ресейлік жас жұлдыз Мирра Андреевамен жұп құрап, ширек финалда америкалық Джессика Пегула мен Томми Полды 11:9 есебімен жеңді. Алайда, жартылай финалда Анисимова/Тьен жұбына 3:10 есебімен жол берді.

Енді теннисшілер маусымның ең беделді турнирлерінің бірі — Индиан-Уэллстегі негізгі жарысқа (WTA-1000 және ATP-1000) қатысады. Еске сала кетейік, Елена Рыбакина 2023 жылы осы турнирдің чемпионы атанған болатын.

Биылғы негізгі жарыста ерлер арасында Джек Дрейпер (Ұлыбритания), ал әйелдер арасында Мирра Андреева (Ресей) өз титулдарын қорғайтын болады.