19 жастағы сарбаз қайтыс болды: Марқұмның жақындары әділдік іздейді

13 мамырда Жетісу облысында 19 жастағы сарбаз қайтыс болды. Марқұм Досымжан Сәлімжанның жақындары істің аяғына дейін жүргізіліп, кінәлінің жауапқа тартылғанын, сондай-ақ материалдық шығынды өтеуін талап етеді, деп хабарлайды Qrnews тілшісі Massaget.kz-ке сілтеме жасап. 

Сарбаздың туған ағасының әйелі Ақниет Суюнгалиева оқиғаның қалай болғанын айтып берді. Оның айтуынша, Досымжан былтыр қазанда әскерге өз еркімен кеткен. Алғашында шағымы болмаған.

"2024 жылғы 3 мамырда таңертең анасына қоңырау шалып, "Мама, ауырып тұрмын, кеудем қысып тұр, қызу бар сияқты" деді. Анасы "Дәрігерге барып қарал" деді. Біраздан соң сержант қонырау шалып, "Баланыз аурып қалды, азқазаны ауырып тұрған сияқты, тамақ ішпегеннен шығар. Қазір дәрігер тексеріп жатыр" деді. Сәлден соң өзіміз қоңырау шалдық, "Апа, сіздің балаңызды Алматыдағы әскери госпитальға жедел алып бара жатыр" деді. Содан хабарсыз кетті. Кешке ғана подполковник Руслан Жылқыбаев қоңырау шалып, "Бәрі жақсы, қазір дәрігерлер асқазанын тазалап жатыр, жара бар сияқты" деді. Бірақ біз сонда да Алматыдағы туысқанымызды ауруханаға жібердік, ол баланың жансақтау бөлімінде жатқанын айтты. Сонда кім кімді алдап отырғаны белгісіз! Ата-енем сол күні түнде Алматыға ұшты", – деді Ақниет Суюнгалиева.

Анасы лейтенант ұлын ұрып-соғып, өз жұмысын істетіп қойғанын айтады. Тіпті әскерге керек зат алу үшін ақша сұратып, бала бірнеше рет несие рәсімдеген.

"Өлім қорытындысы бойынша жүрегі тоқтап қалған. Сот-медициналық сараптама әлі шықпады, 1-2 ай уақыт алады деді. ⁠Бізге тергеу жұмыстары жүріп жатқанын айтты. Кінәлі адамға, яғни лейтенант Ш. Жанботаға санкция жарияланып, ол ұсталған. 4 куәгер сұралып жатыр", – деді Ақниет Суюнгалиева. 

Ол тергеушілер күдіктінің ұсталғанын ауызша ғана айтып, ешқандай құжатпен растамағанын айтады. 

Марқұмның жақындарының құзырлы органға қояр сауалы мен талабы бар.

"Неге бала ауруханада жатқанда білікті дәрігерлер әкелмеді? Сарыөзек горнизонының басшысы Абеков Жасулан Садуұлы неге ауруханаға келмеді? Неге баланың жағдайын сұрамады? Неге қадағаламады? Лейтенанттың ісінен хабары неге жоқ? Балалардың соққыға жығылатынынан неге хабары жоқ? Неге қағазды сарбаздардың ақшасына алады?" – дейді олар.