19 адамға 1 миллиард теңге: ҚТЖ топ-менеджерлердің бонустарына қатысты түсініктеме берді

«Қазақстан темір жолы» ұлттық компаниясы» акционерлік қоғамының Басқарма төрағасы Талғат Алдыбергенов қоғамда үлкен талқылау тудырған топ-менеджерлердің миллиардтық сыйақысы мен бонустарына қатысты ресми мәлімдеме жасады, деп хабарлайды ведомствоның баспасөз қызметі.

Бұған дейін БАҚ беттерінде ҚТЖ-ның қаржылық есептілігіне сілтеме жасала отырып, компания басшылығына берілген сыйақы көлемі 1 миллиард теңгеден асқаны туралы ақпарат жарияланған болатын. Бұл көрсеткіш жолаушылар билеттерінің қымбаттауы және компанияның ішкі қарыздары аясында әлеуметтік желілерде қызу пікірталас тудырды.

Есеп беру кездесуі барысында Талғат Алдыбергенов бұл соманың тек сыйақы емес екенін және оның қалай қалыптасқанын нақтылады:

«Сыйақы тек қана компанияда таза пайда болған жағдайда төленеді. 2025 жылдың қорытындысы бойынша КТЖ таза пайданы 2,1 есеге арттырды. Яғни, 2024 жылы пайда шамамен 185 миллиард теңге болса, 2025 жылдың қорытындысы бойынша 340 миллиард теңгені құрады. Аталған соманың ішіне тек басқарма мүшелерінің ғана емес, сонымен қатар директорлар кеңесінің де төлемдері кіреді. Бұл — еңбекақы, демалыс ақысы және төлемдердің өзге де түрлері», - деді басқарма төрағасы.

Сонымен қатар компания басшысы ҚТЖ-ның және оның атқарушы органының жұмысын құрамында 6 тәуелсіз мүшесі бар директорлар кеңесі бағалайтынын жеткізді. Оның айтуынша, бонустарды төлеу туралы шешім өз бетінше қабылданбайды және ол мынадай үш деңгейлі қатаң тексерістен өтеді:

1 Бірінші кезең: Компанияның ішкі аудит қызметінің тексерісі;

2 Екінші кезең: Директорлар кеңесіне тікелей бағынатын комплаенс-қызметінің сараптамасы;

3 Үшінші кезең: «Самұрық-Қазына» ұлттық әл-ауқат қорының өтінімі бойынша жүргізілетін қорытынды тексеру.

«Шешімді біз емес, директорлар кеңесі қабылдайды», — деп баса айтты спикер. Ресми мәліметке сәйкес, аталған бонустар жалпы саны 19 адамға үлестірілген.