166 бала оқитын мектеп жабылды: Лицензиясыз мектепті жабу туралы шешім шықты

Қарағанды облысының мамандандырылған ауданаралық экономикалық соты 166 бала оқитын жекеменшік мектепті тарату (ликвидациялау) туралы шешім шығарды. Білім ордасы оқу жылы басталғаннан бері тиісті рұқсат құжаттарынсыз қызмет көрсетіп келген, деп хабарлайды ҚР Жоғарғы соты.

Сот мәліметтеріне сәйкес, аталған мектептің иесі болып табылатын ЖШС 2025 жылдың мамыр айында тіркелген. Соған қарамастан, 2 қыркүйектен бастап мектеп лицензия алмастан оқу процесін бастап кеткен. Бұған дейін білім беру мекемесі рұқсатсыз жұмыс істегені үшін әкімшілік жауапкершілікке тартылып, айыппұл төлеген, бірақ қызметін тоқтатпаған.

ЖШС өкілдері сотта талап арызды мойындаған жоқ. Олардың келтірген дәлелдері:

• Мектепте қазіргі уақытта 166 бала білім алуда (оның ішінде көпбалалы және толық емес отбасылардан шыққан балалар бар);
• Штатта 35 қызметкер жұмыс істейді;
• Лицензия алуға қажетті құжаттар топтамасы 90%-ға дайын және өтініш қарау үстінде;
• Ата-аналар тарапынан ешқандай шағым түспеген.

Сот уәкілетті органның ЖШС-ға лицензия беруден екі рет бас тартқанын және бұл шешімдердің шағымданылмағанын анықтады. Судья лицензияның тек қағаз емес, мемлекеттік стандарттардың сақталуын, педагогтардың біліктілігі мен инфрақұрылым қауіпсіздігін растайтын жалғыз кепіл екенін атап өтті.

 «Лицензиясы жоқ мектептер мемлекеттік үлгідегі аттестат бере алмайды. Лицензияның болмауы білім сапасына әсер етпейді деген уәж негізсіз», - делінген сот шешімінде.

Нәтижесінде, сот заңды тұлғаны мәжбүрлі түрде тарату туралы талап арызды қанағаттандырды. Сот шешімі әлі заңды күшіне енген жоқ.