16 сағаттық тікелей эфир: «Референдум – 2026» онлайн марафоны басталды

Республикалық референдум аясында «Референдум – 2026» атты ауқымды онлайн марафон басталды. Шараны «Қазақстан» телерадиокорпорациясы ұйымдастырып отыр. Таңғы 09:00-де басталған медиа-марафон түнгі 01:00-ге дейін жалғасып, жалпы ұзақтығы 16 сағатқа созылады.

Тікелей эфир барысында қоғамдағы өзекті мәселелер көтеріліп, ел дамуына қатысты тың бастамалар мен инновациялық жобалар таныстырылады. Онлайн марафонның ашылуында 100 домбырашы әйгілі «Балбырауын»күйін орындап, көрермендерге ерекше әсер сыйлады.

Іс-шара барысында алғаш рет отандық өнертапқыштар жасаған роботтар жүргізушілерге көмектесіп, ал голограмма технологиясы арқылы Қазақстанның жетістіктері таныстырылады.

Марафон шеңберінде бес негізгі алаң жұмыс істейді. Басты сахнада қоғам қайраткерлері, сарапшылар мен танымал тұлғалардың қатысуымен пікірталастар өтсе, ток-шоу алаңында білім, креатив индустрия, цифрландыру, жасанды интеллект және жастар мәдениетіне қатысты өзекті тақырыптар талқыланады.

Ал инновация алаңында жасанды интеллект жобалары, роботтар, IT стартаптар мен жаңа технологиялық өнімдер көпшілік назарына ұсынылады. Бұл алаң биыл алғаш рет ұйымдастырылып отыр. Сонымен қатар орталық коммуникациялар алаңында әр екі сағат сайын ресми органдар мен сарапшылар референдум барысына қатысты пікір білдіреді. Экспресс-камера форматында журналистер қатысушылардан блиц-сұхбат алып, көрермендердің көзқарасын тікелей эфирде көрсетеді.

Онлайн марафон аясында киберспорт, инклюзивті қоғам, әйелдер құқықтары, балалар қауіпсіздігі, білім беру, патриотизм, креативті индустрия, волонтерлік қозғалыс, жасанды интеллекттің дамуы сияқты маңызды тақырыптар талқылануда.

Медиа алаңда отандық өнертапқыштардың бірқатар жобалары ұсынылды. Олардың қатарында ағылшын тілін үйретуге арналған Aleem қосымшасы, болашақта медицинада қолданылуы мүмкін механикалық жүрек жобасы, сал ауруына шалдыққан адамдарға арналған арнайы арба, сондай-ақ майтабанды анықтайтын «ақылды ұлтарақ» бар.

Бұдан бөлек, төтенше жағдайлар қызметі өрт сөндіруге арналған роботтың мүмкіндіктерін таныстырады. Жасанды интеллект негізінде жұмыс істейтін робот иттер белгіленген аумақты автономды түрде бақылап, ақпаратты басқару орталығына жібереді. Сондай-ақ шахтерлердің қауіпсіздігін арттыруға арналған «Mainsafe» смарт-қолғапы мен ластанған ауадан принтерге арналған бояу өндіруге мүмкіндік беретін инновациялық жоба да көпшілікке ұсынылды.

Марафонға халықаралық UAE SWAT Challenge турнирінде әйелдер арасында бірінші орын алған «Томирис» арнайы жасағы да қатысып, тәжірибелерімен бөлісті. Сонымен қатар саясаткерлер, сарапшылар, қоғам қайраткерлері, өнер және спорт өкілдері, оның ішінде киберфутболдан Қазақстан құрамасының ойыншысы Абылайхан Ахметов пен әлем чемпионы Ризабек Айтмұхан сияқты танымал тұлғалар қатысуда.

Онлайн марафон отандық БАҚ-тың YouTube, Facebook, Instagram, TikTok және Telegram желілеріндегі ресми парақшаларында тікелей көрсетіліп жатыр. Сонымен қатар «Референдум – 2026» арнайы Telegram арнасы іске қосылған.

Наурызнама онкүндігі аясындағы Қайырымдылық күніне орай марафон барысында «Қайырымды жан» номинациясының жеңімпаздары марапатталады. Ал сахнада BAYANSULU, AUKA, KOBA секілді жас жұлдыздар өнер көрсетіп, кешті DJ MONOGAMM музыкалық сүйемелдеумен әрлейді.

«Референдум – 2026» онлайн марафоны қоғамдағы маңызды мәселелерді талқылауға, пікір алмасуға және отандық инновациялық жобаларды таныстыруға арналған ірі ақпараттық алаңға айналды.