16 миллион қазақстандықтың дерегі желіге тарады: ІІМ қылмыстық іс қозғады

16 миллионға жуық қазақстандықтың жеке деректері интернетке таралуына байланысты ҚР Қылмыстық кодексінің 147-бабы («Жеке өмірге қолсұғылмаушылықты және қаржылық деректер туралы заңнаманы бұзу») бойынша қылмыстық іс тіркелді. Бұл туралы Бас прокурордың орынбасары Ғалымжан Қойгельдиев Сенат кулуарында мәлімдеді.

«Цифрлық деректердің таралуына байланысты іс қозғалды. Қазір тергеу амалдарын жалғастыру үшін ол іс Ішкі істер министрлігіне берілді», – деді Қойгельдиев.

Еске салайық, 16 маусым күні TSARKA (кибершабуылдарды талдау және зерттеу орталығы) 16,3 млн қазақстандықтың жеке деректері желіге тарағанын растаған еді. Таратылған базаға азаматтардың толық аты-жөні, туған күні, ЖСН, мекенжайы, сонымен бірге мобильді, үй және жұмыс нөмірлері кірген.