$ 469.49 € 552.59 ₽ 6.24

15 сәуірден бастап мобильді аударымдар тексеріле бастайды

Абдрахманов Мағжан
15 сәуір 2026, 12:59
15 сәуірден бастап мобильді аударымдар тексеріле бастайды Сурет авторы: myfin.by

Қазақстанда 15 сәуірден бастап салық органдары азаматтардың мобильді аударымдарын тексере бастайды. Бұл туралы Қаржы министрлігі мен Мемлекеттік кірістер комитеті хабарлады.

Ведомство мәліметінше, тексеріс банктер ұсынған 2026 жылдың бірінші тоқсанына қатысты деректер негізінде жүргізіледі. Негізгі назар үш ай қатарынан ай сайын 100 және одан көп әртүрлі көзден ақша түскен және жалпы сомасы 12 ең төменгі жалақыдан (1 млн 20 мың теңге) асқан жағдайларға аударылады.

Мамыр айынан бастап осындай операциялар анықталған азаматтарға e-Salyq Azamat қосымшасы, салық төлеушінің жеке кабинеті немесе SMS арқылы хабарлама жіберіледі. Азаматтарға қаражаттың қайдан және қандай мақсатта түскенін түсіндіру үшін 30 жұмыс күні беріледі.

Ресми түсіндірмеде туыстар арасындағы көмек, сыйлық, ортақ шығындар немесе қайырымдылық мақсатындағы аударымдар кәсіпкерлік табыс ретінде қаралмайтыны айтылған. Мұндай жағдайларда чат жазбалары немесе басқа дәлелдер жеткілікті болуы мүмкін.

Алайда түсініктеме негізсіз деп танылса, қосымша салық тексерісі тағайындалады. Заңсыз кәсіпкерлік анықталған жағдайда азамат жеке кәсіпкер ретінде тіркеліп, салық төлеуге міндеттеледі.

Ережені бұзғандарға айыппұл қарастырылған. Тіркелмеген кәсіпкерлік үшін 15-тен 100 АЕК-ке дейін айыппұл салынса, табысты жасырғаны дәлелденсе қосымша салық пен өсімпұл есептеледі.

Бұл шара көлеңкелі экономиканы азайтуға және қаржы айналымының ашықтығын арттыруға бағытталған.

#Мобильді аударымдар #Салық тексеруі #Салық кодексі #Салық

Соңғы жаңалықтар