130 доллар түсті ме? Қазақстандық балалардың шотына ақша аударылды

«Ұлттық қор – балаларға» бағдарламасы аясында 2026 жыл үшін Қазақстандағы 18 жасқа толмаған барлық балалардың есепшотына 130,71 АҚШ доллары көлемінде қаражат аударылды.

Биыл бағдарламаға шамамен 6,9 млн бала қатысып отыр. Ал кәмелет жасына жеткен азаматтарға төленетін қаражаттың жалпы көлемі 44,5 млн долларды құрайды.

Ресми мәліметке сәйкес, бағдарлама іске қосылған үш жыл ішінде инвестициялық кірісті қоса есептегенде, әр балаға жинақталған қаражат көлемі 370 доллардан асты.

Айта кетейік, «Ұлттық қор – балаларға» бағдарламасы Қазақстан азаматтарының болашақ ұрпағы үшін қаржылық қор қалыптастыруды көздейді. Жиналған қаражатты балалар 18 жасқа толғаннан кейін білім алуға немесе тұрғын үй жағдайын жақсартуға пайдалана алады.