13 адамның өмірін қиған өрт: Алматыдағы хостелдің иесі сотталды

Алматыда 2023 жылдың қарашасында хостелде болған өртке байланысты қылмыстық іс бойынша сот үкімі шықты. Қайғылы оқиға салдарынан 13 адам көз жұмған болатын.

Сотталушылар қатарында хостел директоры Әділбек Мұхамедияров пен нысанда өртке қарсы жүйені орнатқан «Гидсервис» мердігер ұйымының өкілі Александр Пекельник бар. Мемлекеттік айыптаушы Мұхамедияровқа 5 жыл, Пекельникке 4 жыл бас бостандығынан айыру жазасын сұрады.

Сот үкіміне сәйкес, Мұхамедияров «өрт қауіпсіздігі талаптарын бұзды» деп танылып, 5 жылға қамалды. Пекельник «қауіпсіздік талаптарына сай келмейтін жұмыс жүргізгені» үшін 4 жылға сотталды. Екеуі де жазасын қауіпсіздігі барынша төмен мекемеде өтейтін болды.

Жәбірленушілер тарапынан түсірілген азаматтық талап-арыздар ішінара қанағаттандырылды.

Еске салайық, 2023 жылғы 30 қарашада таңғы уақытта Алматыдағы Әди Шәріпов көшесінде орналасқан хостелде өрт шыққан. Өрт кезінде ішінде 72 адам болған, олардың 59-ы өз бетімен сыртқа шығып үлгерді, 13 адам қаза тапты. Тағы үш адам ауруханаға түсті.

Тексеру барысында ғимараттың бастапқыда дүкен ретінде тіркелгені анықталды. Тергеу 2024 жылдың қарашасында аяқталған.