13,5 млрд теңге қайда кетті? Қаржы министрлігінің бұрынғы топ-менеджері қамауға алынды

Ұлттық қауіпсіздік комитеті Қаржы министрлігіне қарасты «Проблемалық кредиттер қоры» АҚ-ның бұрынғы басқарма төрағасы ұсталғанын хабарлады. Ол қызметтік өкілеттігін асыра пайдаланды деген күдікке ілінген.

Тергеу нұсқасына сәйкес, күдікті кепілдегі мүлікті сатудан түскен қаражатты қорға аударудың орнына, оны жеке меншік иесіне заңсыз ұстап қалуға мүмкіндік берген. Соның салдарынан мемлекетке 11,4 млрд теңге көлемінде залал келтірілген.

Сонымен қатар ол мемлекеттік мүлікті төмен бағамен сатқан деген күдік бар. Бұл әрекеттен бюджет 1,3 млрд теңгеден астам қаржыдан қағылған. Бұдан бөлек, борышкер компаниялардың иесі мен оның сыбайластары да ұсталған. Олар жалған құжаттар арқылы кепілдегі жер телімдерін сатып, қорға 800 млн теңге шығын келтірді деген күдік бар.

Сот санкциясымен күдіктілер қамауға алынды. Оларға алаяқтық және қызметтік өкілеттігін асыра пайдалану баптары бойынша айып тағылған. Мүліктеріне тыйым салынды. Тергеу жалғасып жатыр.