124 миллиард теңге таратылды: Мемлекет кімдердің депозитін толықтырды?

«Отбасы банк» тұрғын үй құрылыс жинақ жүйесіне қатысушылардың шоттарына 2025 жылдың қорытындысы бойынша мемлекеттік сыйлықақы аударылғанын хабарлады. 591 мыңнан астам салымшының әрқайсысы 157 280 теңге көлеміндегі максималды төлемге ие болды.

Мемлекет тарапынан аударылған сыйлықақының жалпы сомасы 124,4 млрд теңгені құрады. Сыйлықақы алудың басты шарттары:

• Депозитті жыл ішінде кемінде 200 АЕК (786 400 теңге) сомасына толықтыру;
• 2025 жыл үшін максималды төлем мөлшері – 157 280 теңге.

Банк мәліметінше, жинақ шоттарына қаражат өткен демалыс күндері (28 ақпан және 1 наурыз) түскен. Олардың арасында:

• 388 799 салымшы – өз баспанасы жоқ және кезекте тұрған азаматтар;
• 237 688 адам – болашақта 2%-дық мөлшерлемемен жеңілдетілген несие алу үшін қаражат жинаушылар;
• 303 406 бала – арнайы балалар депозитінің иелері (олардың шотына 9,6 млрд теңге аударылды).

Сондай-ақ әлеуметтік санаттар бойынша:

• 12 059 – І және ІІ топтағы мүгедектігі бар жандар;
• 57 551 – көпбалалы отбасы;
• 13 966 – жетім және ата-анасының қамқорлығынсыз қалған балалар.

Биылғы жылы сыйлықақы мөлшері артады. 2026 жылдың қорытындысы бойынша максималды мемлекеттік сыйлықақы 173 000 теңгені құрамақ. Оны алу үшін салымшылар жыл соңына дейін шотта кемінде 865 000 теңге жинауы қажет. Бұл үшін ай сайын орта есеппен 73 000 теңгеден салып тұру ұсынылады.