12 миллионға түскен "қамқорлық": Алматыда экс-шенеунік сотталды

Алматы қаласы мәдениет басқармасы басшысының бұрынғы орынбасары мемлекет қаржысын жымқырды деген айыппен 4 жыл 6 айға бас бостандығынан айырылды. Бұл туралы қалалық сот хабарлады.

Тергеу мәліметінше, экс-шенеунік 2022 жылдың желтоқсанынан 2023 жылдың қыркүйегіне дейін белгілі бір жеке компанияға заңсыз қамқорлық көрсетіп, соның жұмысына араласқан. Қызмет бабын жеке пайда табу мақсатында пайдалану арқылы ол мемлекетке 12 миллион теңгеден астам шығын келтірген.

Сот оны лауазымдық өкілеттігін теріс пайдалану, заңсыз кәсіпкерлікпен айналысу және сеніп тапсырылған мүлікті иемдену баптары бойынша кінәлі деп таныды.

Айыпталушы тағылған айыппен келіспейтінін мәлімдеді. Алайда сот үкім шығарды. Үкім әлі заңды күшіне енген жоқ.