100 мың теңгеге пәтер алған: Алаяқтық жасады деп айыпталған азамат ақталды

Жоғарғы сот Бас прокурордың наразылығы бойынша бұрын алаяқтық жасады деген айыппен сотталған Кенжеғаринді ақтады, деп хабарлады Бас прокуратура.

Ер адам мемлекеттік комиссия арқылы Қостанай облысы Алтынсарин ауданы Малая Чураковка ауылындағы пәтерді заңдастырып, тіркеген. Осыдан кейін Кенжеғариннің баспана сатып алғаны туралы берген ақпаратының жалған екені анықталып, оның үстінен қылмыстық іс қозғалды.

Аудандық сот Кенжеғаринді бір жылға бас бостандығын шектеу жазасына кесті. Ер адам үкімге апелляциялық шағым түсіргенімен, облыстық сот шешімді өзгеріссіз қалдырды.

Жоғарғы сот Кенжеғариннің пәтерді 1997 жылы 100 мың теңгеге сатып алғанын анықтады. Ол ақшаны қолхатсыз, бірақ куәгерлердің көзінше тапсырған.

Пәтерді сатқан кісіде пәтердің өзіне тиесілі екенін растайтын құжаттары болмаған, өйткені ол да оны бұрынғы меншік иесімен ауызша келісім негізінде алған.

"Мұндай жағдайда Кенжеғарин азаматтық сотқа шағынып, мәмілені орындалды деп тану арқылы пәтер иесімен мәселені шешуі керек еді", – делінген хабарламада.

Жоғарғы сот Кенжеғариннің алдау ниеті болмағанын, пәтерді сатушымен оның арасында азаматтық-құқықтық қатынастар туындағанын анықтады.