100 күн қалғандағы дабыл: Мексикадағы матчтар басқа елге ауыстырылуы мүмкін бе?

Халықаралық футбол федерациясы (FIFA) 2026 жылғы Әлем кубогының басталуына тура 100 күн қалғанда турнирдің ресми постерін жариялады. Солтүстік Американың үш елінде - АҚШ, Канада және Мексикада өтетін айтулы дода 11 маусым мен 19 шілде аралығында жоспарланған, деп хабарлайды FIFA.com

Турнирдің басты символын жасауға үш елдің өнерпаздары атсалысты: канадалық Карсон Тинг, мексикалық Минерва GM және америкалық Хэнк Уиллис Томас.

Постердің ортасында допты теуіп жатқан футболшының сұлбасы бейнеленген. Фон ретінде қатысушы елдердің ұлттық түстері мен нышандары пайдаланылған:

• Канада үшін - қызыл;

• Мексика үшін - жасыл;

• АҚШ үшін - көк түс таңдалған.

ФИФА-ның баспасөз хабарламасында бұл туынды «ынтымақтастық пен бірлік рухын паш ететіні» атап өтілген. Сонымен қатар, матчтар өтетін 16 қаланың да жеке постерлері таныстырылды.

Ұйымдастырудағы қиындықтар: Қауіпсіздік пен саяси мәселелер

Турнирдің басталуына санаулы күндер қалғанда ұйымдастырушылар бірқатар мәселелерге тап болды:

1. Мексикадағы жағдай: Ықпалды есірткі баронының өлімінен кейін туындаған қақтығыстарға байланысты ФИФА бұл елдегі матчтарды басқа жаққа ауыстыру мүмкіндігін қарастыруда.

2. Иранның қатысуы: Иран құрамасы турнирге қатыспауы мүмкін екендігі туралы ақпарат тарады.

Тарихта тұңғыш рет Әлем чемпионатында 48 ұлттық құрама бақ сынайды. Қазіргі таңда финалдық кезеңге жолдама алған 42 команда белгілі. Олардың қатарында Аргентина, Бразилия, Франция, Германия секілді алпауыттармен қатар Өзбекстан құрамасы да бар.

Қалған жолдамалар наурыз айының соңында өтетін құрлықаралық плей-офф матчтарында сарапқа салынады. Конфедерациялар бойынша квоталар келесідей бөлінген:

• Еуропа: 16 жолдама

• Африка: 9,5

• Азия: 8,5

• Оңтүстік және Солтүстік Америка: әрқайсысына 6,5-тен

• Океания: 1,5