1 шілдеден бастап елімізде 30 жаңартылған теміржол вокзалы іске қосылады

Қазақстанның теміржол инфрақұрылымын жаңғырту бағдарламасы қарқынды жүріп жатыр. Көлік министрлігінің мәліметінше, республика бойынша 124 вокзал кешенін қамтитын ауқымды жобаның алғашқы нәтижелері 1 шілдеден бастап көрініс табады. Осы күнге дейін заманауи талаптарға сай жаңартылған 30 теміржол бекеті жолаушыларды қабылдауға дайын болады.

Қазіргі таңда «Қазақстан темір жолы» компаниясы мен жергілікті атқарушы органдар бірлесіп, тек вокзал ғимараттарын ғана емес, сонымен қатар іргелес аумақтарды да абаттандыру жұмыстарын жүргізіп жатыр. Құрылыс-монтаждау жұмыстары бойынша Солтүстік Қазақстан, Батыс Қазақстан, Алматы және Қарағанды облыстары жоғары көрсеткіштерге қол жеткізді. Мәселен, маусым айының басында Абай облысында «Аул» және «Белагаш» бекеттері толық іске қосылды. Маусым айының соңына дейін тағы 28, ал шілде айында жалпы саны 42 вокзалды пайдалануға беру көзделіп отыр.

Жоба аясында барлық вокзалды бірдей үлгіде салу қарастырылмаған. Әсіресе, Астана-1, Алматы-2 және Түркістан вокзалдары сияқты тарихи құндылығы жоғары нысандардың сәулеттік келбетін сақтап қалу басты назарда. Бұл бағыттағы жұмыстар ғимараттың сыртқы көрінісін ғана емес, перрондар мен платформаларды, сондай-ақ жолаушылардың өтуіне ыңғайлы жабық өтпелер мен конкорстарды салуды қамтиды.

Вокзалдарды модернизациялау жобасы 168 миллиард теңге көлеміндегі несиелік қаражат есебінен жүзеге асырылуда. Инфрақұрылымды жаңарту шығындарын өтеу мақсатында «Қазақстан темір жолы» Табиғи монополияларды реттеу комитетіне тарифтерді қайта қарау туралы өтінім жолдады. Бұл қаражат 2026-2030 жылдарға арналған инвестициялық бағдарлама аясындағы теміржол учаскелері мен басқа да техникалық нысандарды жаңартуға жұмсалады.