Балалардың қауіпсіздігі үшін Астанада мыңға жуық терезе шектеуіші орнатылады

Астанада балалардың терезеден құлау қаупін азайту үшін балалы отбасылардың үйлеріне мыңға жуық арнайы шектеуіш орнатылып жатыр. Бұл туралы қала әкімдігінің ресми сайты хабарлады.

«Қауіпсіз терезе» шарасын қалалық Төтенше жағдайлар департаменті полиция және еріктілермен бірлесіп өткізіп жатыр. Арнайы топтар алдын ала жасалған тізім бойынша көпқабатты үйлерді аралап, терезенің толық ашылуына жол бермейтін құрылғыларды орнатады.

Астана қаласы Төтенше жағдайлар департаментінің инженері Әли Арғынбаевтың айтуынша, күн жылынған кезде балалардың терезеден құлау қаупі күшейеді. Қала аудандарына бөлінген жедел топтар қысқа мерзімде мүмкіндігінше көп үйді қамтуды көздейді.

«Қазіргі таңда бізде қала бойынша орнатылатын мыңға жуық блокиратор бар. Алайда бұл жұмыс мұнымен тоқтамайды, қамту ауқымын кеңейтуді жалғастырамыз. Өткен жылы да осындай іс-шаралар өткізілген болатын және бұл жұмысты жергілікті атқарушы органдармен бірлесіп жалғастырамыз», – деп түсіндірді Әли Арғынбаев.

Мамандар ата-аналарға балаларды қысқа уақытқа да қараусыз қалдырмауды ескертті. Сондай-ақ шыбын-шіркейге арналған тор баланы құлаудан қорғай алмайды. Терезе маңына бала өрмелеп шығуы мүмкін жиһаз қоюға да болмайды.

Ұйымдастырушылар бұл жұмыстың алдағы уақытта да жалғасатынын мәлімдеді. Шектеуіш орнатылған отбасылар шараның әсіресе бірнеше бала тәрбиелеп отырған үйлер үшін маңызды екенін атап өтті.

Қала тұрғыны Жұпаргүл Сванованың айтуынша, олардың пәтерінде үлкен отбасы тұрады, сондықтан қауіпсіздік мәселесі аса өзекті.

«Біз – үлкен отбасымыз. Үйде бес немерем болады, кешке тағы балалар келеді. Бүгін бізге қорғаныс құрылғыларын орнатып берді, бұл біз үшін өте маңызды. Бұрын мұндай шаралар болмағандықтан, балалардың қауіпсіздігіне алаңдайтынбыз. Осындай көмек көрсеткендеріңіз үшін алғыс айтамыз», – деді астаналық тұрғын.