Қазақстандық оқушылар халықаралық әл-Хорезми олимпиадасында 100 пайыздық нәтиже көрсетті

Өзбекстан Республикасының Ташкент қаласында математика және информатика пәндерінен мектеп оқушылары арасында өткен әл-Хорезми атындағы халықаралық олимпиада (KhMIO) мәресіне жетті. Дүбірлі білім додасында Қазақстан құрамасы айрықша нәтиже көрсетіп, ел қоржынына 8 медаль салды.

Әлемнің 10 елінен жиналған ең дарынды оқушылар бақ сынасқан зияткерлік сайыстың басты мақсаты — математика және информатика саласындағы талантты жастарды анықтау, сондай-ақ олардың ғылыми-зерттеу және интеллектуалдық әлеуетін дамыту болып табылады. Түрлі деңгейдегі теориялық және практикалық күрделі тапсырмаларды орындау барысында отандық оқушылар жоғары дайындықтары мен білімдерін паш етті.

Сайыс қорытындысы бойынша сегіз оқушыдан жасақталған Қазақстан құрамасы жүз пайыздық көрсеткішке қол жеткізіп, 4 алтын, 3 күміс және 1 қола медальді жеңіп алды.

Алтын медаль иегерлері:

 Бердімұрат Ахмет – Ақтөбе облысының дарынды балаларға арналған мамандандырылған «Білім-Инновация» лицей-интернатының 9-сынып оқушысы;

 Бексұлтан Жанделдинов – Павлодар қаласының «Жас Дарын» мамандандырылған мектеп-лицейінің 8-сынып оқушысы;

 Алдияр Мұхитұлы – Алматы қаласындағы Назарбаев Зияткерлік мектебінің (NIS) 9-сынып оқушысы;

 Әлішер Еламан – Алматы қаласындағы Республикалық физика-математика мектебінің (РФМШ) 8-сынып оқушысы.

Күміс медальмен марапатталғандар:

 Әмір Белгімбаев – Алматы қаласындағы Республикалық физика-математика мектебінің (РФМШ) 9-сынып оқушысы;

 Ислам Ермұханов – Ақтөбе облысының дарынды балаларға арналған мамандандырылған «Білім-Инновация» лицей-интернатының 9-сынып оқушысы;

 Санжар Жангелді – Қарағанды қаласындағы Н. Нұрмақов атындағы мамандандырылған мектеп-лицей-интернатының 9-сынып оқушысы.

Қола медаль жүлдегері:

Әлішер Ғаллам – Павлодар қаласының «Жас Дарын» мамандандырылған мектеп-лицейінің 9-сынып оқушысы.

Ұлттық құраманың бұл жетістікке жетуіне жетекшілік еткен Алматы қаласындағы №165 мамандандырылған лицейдің математика пәні мұғалімі Асхат Әбдіқұлов пен Халықаралық ақпараттық технологиялар университетінің (IITU) сеньор-лекторы Айбар Қуанышбайдың еңбегі зор. Қазақстандық оқушылардың халықаралық аренадағы бұл жеңісі отандық білім беру жүйесінің жоғары бәсекеге қабілеттілігін тағы бір мәрте дәлелдеді.