«Болашақ» стипендиясы 15 жылдан кейін алғаш рет өсуі мүмкін

Қазақстанда «Болашақ» стипендиясының мөлшерін арттыру мәселесі қаралып жатыр,. Бұл жөнінде Халықаралық бағдарламалар орталығы басқарма төрағасының орынбасары Абай Рахмет мәлімдеді.

Оның айтуынша, соңғы 15 жылда стипендия көлемі өзгермеген, ал осы кезеңде инфляция өскен. Қазіргі уақытта төлемді ұлғайту мәселесі пысықталып жатыр, нақты шешім 2027 жылға дейін қабылдануы мүмкін.

Абай Рахметтің сөзінше, стипендия мөлшері ел мен қалаға байланысты әртүрлі. Мысалы, Нью-Йоркте ай сайынғы төлем шамамен 2200 доллар болса, басқа өңірлерде ол төмен. Осыған байланысты барлық бағыт бойынша талдау жүргізілген.

«Мүмкін нұсқалардың бірі – стипендия санын қысқартып, үнемделген қаражатты ай сайынғы төлемдерді арттыруға бағыттау», – деді ол.

Алдын ала бағалау бойынша, стипендия көлемін 10–15 пайызға арттыру жоспарланып отыр.

Айта кетейік, бұған дейін «Болашақ» бағдарламасына қатысты іріктеу талаптарына сай келмеген үміткерлерге қаражат бөлінгені туралы ақпарат жарияланған болатын.