Бастауыш сыныптардағы артық пәндерді қысқарту қажет – депутат

Мәжіліс депутаты Қайрат Балабиев ҚР Премьер-министрінің орынбасары Ермек Көшербаевқа жолдаған депутаттық сауалында білім беру жүйесін жетілдіру мәселесін көтерді.

Депутаттың айтуынша, Мемлекет басшысы Қасым-Жомарт Тоқаевтың бастамасымен соңғы жылдары салада бірқатар маңызды қадам жасалды: 2019 жылдан бері білімге бөлінетін бюджет үш есе артты, 1200-ден астам жаңа мектеп ашылды, «Педагог мәртебесі туралы» заң қабылданды. Сондай-ақ ұстаздарға «Қазақстанның еңбек сіңірген ұстазы» атағы беріле бастады.

Сонымен бірге Балабиев бірқатар ұсынысты ортаға салды:

• 1–4 сыныптарда «Әліппе», «Ана тілі» және математика негізгі пән ретінде сақталуы тиіс;

• Жоғары сыныптарда кәсіби бағдарға сай негізгі пәндерді тереңдетіп оқыту және БЖБ, ТЖБ жүйесін алып тастау қажет;

• Балабақшадан бастап еңбекке баулу, шығармашылық пен тұлғалық дамуға бағытталған бірыңғай әдістеме енгізу керек;

• Бірыңғай мектеп формасын қабылдап, ата-аналарды қымбат киім сатып алуға мәжбүрлеуді тоқтату маңызды;

• Мұғалімдерді бюрократиялық есептен босатып, оқыту мен тәрбиелеуге көбірек мүмкіндік жасау қажет;

• Біліктілікті арттыру курстарын тәжірибеге негізделген форматқа көшіру ұсынылды.

Депутаттың пікірінше, білім сапасын арттыру тек оқу құралдарымен емес, әлеуметтік әділеттілікті қамтамасыз етумен де байланысты. Осы орайда ол мұқтаж отбасыларды қолдауға бағытталған «әлеуметтік әмиян» жүйесін тиімді іске қосуды ұсынды.