Балаларды құлдықта ұстаған: Жамбыл облысында барлық білім беру мекемелері тексеріледі

Жамбыл облысында Талас ауданында екі жасөспірімнің құлдықта болуы дерегіне байланысты ауқымды тексеріс жүргізіледі. Бұл туралы облыс әкімінің баспасөз қызметі хабарлады.

Облыс әкімі Ербол Қарашөкеевтің тапсырмасымен облыс әкімінің орынбасары жетекшілік ететін арнайы жұмыс тобы құрылды. Топ балалардың қалайша құлдыққа түскенін жан-жақты зерттейді.

"Жұмыс қорытындысы бойынша қосымша ақпарат береміз. Қазіргі уақытта құзырлы органдармен бірлесіп жасөспірімдердің қауіпсіздігін қамтамасыз етуге нақты шаралар қабылдап жатырмыз", – делінген әкімдік мәлімдемесінде.

Сондай-ақ өңірдегі өзге де білім беру ұйымдарына кешенді тексеру жүргізу жоспарланып отыр.

Бұған дейін әлеуметтік желіде тараған видеода бір бала өзін бес жыл бойы ұстап, ұрып-соғып, аш қалдырып, мал бақтыруға және қайыр сұратуға мәжбүрлегенін айтқан.

Полиция мәліметінше, кәмелетке толмағандар Тараз қаласындағы қиын өмірлік жағдайға тап болған балаларды қолдау орталығына жеткізілді. Аталған факті бойынша қылмыстық іс қозғады.