Асхат Аймағамбетов: Мұғалімдерді «рилс» түсіруге мәжбүрлеуге тыйым салынады

Оқу-ағарту министрі Асхат Аймағамбетов педагогтарды артық жүктеме мен бюрократиядан қорғайтын арнайы заң жобасы әзірленгенін мәлімдеді. Жаңа құжат мұғалімдердің құқығын кеңейтіп, олардың негізгі міндетінен тыс жұмыстарға тартылуына тосқауыл қоймақ.

Министрдің айтуынша, заң қабылданған жағдайда мұғалімдерді мынадай әрекеттерге мәжбүрлеуге ресми түрде тыйым салынады:

• Жұмыс уақытында әлеуметтік желілерге «рилстер» түсіру және парақша жүргізу;
• Түнгі уақытта немесе жұмыс графигінен тыс кезде WhatsApp желісіндегі хабарламаларға жауап беру;
• Есептерді электронды және қағаз түрінде екі қайтара тапсыру.

«Мұғалімдер жұмыс уақытынан тыс шаруалармен емес, балаларға сапалы білім мен саналы тәрбие берумен айналысуы тиіс», – деп атап өтті Аймағамбетов.

Қазіргі таңда заң жобасына қатысты ұсыныстар жиналуда, ал келесі аптадан бастап жұмыс тобында талқылау кезеңі басталады.

Оқу-ағарту министрлігінің мәліметінше, соңғы алты жылда мұғалімдердің құқығын бұзу көрсеткіші үш есеге азайған:

• 2020-2022 жылдары: 111 жағдай;
• Соңғы үш жылда: 38 жағдай тіркелген.

Ең жиі кездесетін бұзушылықтар қатарында педагогтарды өз міндетіне жатпайтын жұмыстарға жегу, балағаттау, сондай-ақ түрлі басылымдарға жазылуға немесе концерт билеттерін сатып алуға мәжбүрлеу әрекеттері бар.

Еске сала кетсек, 2025 жылдың соңында Білім беру саласында сапаны қамтамасыз ету комитетінің төрағасы Серік Әшіров Қазақстандағы мұғалімдердің басым көпшілігі өз жұмысы мен жалақысына көңілі толатынын мәлімдеген болатын.