Кәсіпкер Айдын Рахымбаев өзі өскен ауылына 11 миллион доллар қаражат құйды

Бұл жайлы Altainews.kz-ке сілтеме жасай отырып, QRNews хабарлайды.

Осы жылы Құлынжон мектебі 60 жылдық мерейтойын атап өтуде. Атаулы күні ауылға жаңа интернат пен спорт кешені тарту етілді.

Мектептің негізі Шығыс Қазақстан облысының Самар ауданына қарасты Құлынжон ауылында 1966 жылы қаланған. Алты онжылдық ішінде шағын ауыл мектебі талай түлегін өмірге жолдап, ауылдың қоғамдық өмірінде өзіндік орнын нығайтты.

Мерейтой аясында ауылдан шыққан кәсіпкер, меценат Айдын Рахымбаевтың қолдауымен мектепте жаңа интернат пен спорт кешені салынып, мектептің материалдық-техникалық базасы толықтай жаңартылды. Ашылу салтанаты жаңа оқу жылының басталуымен тұспа-тұс келді.

Өз ретінде Айдын Рахымбаев өз сөзінде мақсаттарының тек инфрақұрылым салумен шектелмейтінін атап өтті. Оның айтуынша, басты міндет — жерлестеріне, яғни оқушыларға, мұғалімдерге және ауданның барлық тұрғындарына дамуға нақты мүмкіндік жасау.

Белгілі болғандай, Айдын Рахымбаев туған өлкені дамытуға жеке қаражатының шамамен 11 миллион долларын жұмсаған. Бұл қаражат бұрын іске асырылған білім беру жобаларын, сондай-ақ мерейтоймен қатар старт алған денсаулық сақтау жүйесін жаңғырту бағдарламасын қамтиды. Самар ауданындағы медициналық желіні жаңғырту жобасы алдағы екі жылға жоспарланған. Оның аясында аудандық орталық аурухана, фельдшерлік-акушерлік және медициналық пункттерді жөндеу көзделіп отыр.

Шараға Шығыс Қазақстан облысының әкімі Нұрымбет Сақтағанов қатысты. Ол бұл бастамалардың Мемлекет басшысы Қасым-Жомарт Тоқаевтың ауыл мен қала баласына сапалы білім алуға тең мүмкіндік жасау, өңірлердің әлеуметтік инфрақұрылымын дамыту жөніндегі тапсырмаларымен толық үндесетінін ерекше атап өтті. Оның сөзінше, туған жеріне қолдау көрсетуге ниетті кәсіпкерлердің елді мекендердің дамуына үлес қосуы — бизнестің әлеуметтік жауапкершілігінің нақты көрінісі.

Салтанатты іс-шара барысында қолдау тек Құлынжон мектебімен шектелмегені белгілі болды. Сол күні Самар ауданындағы Сарыбел орта мектебі мен Жұбандық Болғанбаев атындағы Самар орта мектеп-лицейіне де жаңа автобустардың кілттері салтанатты түрде табысталды. Қонақтардың айтуынша, бұл — ауданның білім беру инфрақұрылымын жүйелі түрде жаңғырту жұмысының жалғасы екенін көрсетеді.

Соңғы жылдары Құлынжон ауылында білім беру инфрақұрылымы жүйелі түрде дамып келеді. Жаңа интернаттың ашылуы, атап айтқанда, көрші елді мекендерден келетін балаларға оқуға қолайлы жағдай жасауға мүмкіндік береді. Мамандардың пікірінше, жеке кәсіпкерлердің осындай ұзақ мерзімді әрі кешенді бағдарламаларға қатысуы — өңірлік дамудың тұрақты моделін қалыптастырудың бір көрінісі болып отыр.