Журналистикадағы тұлғалар - шеберлік мектебі

Мен ұлттық құндылықтарды насихаттайтын мәртебелі мамандық иесі журналист болғым келеді.

Қасиетті қалам иесі болу арманымның мәні – халыққа қызмет ету, қоғамдағы шындықты жеткізу. Журналистика – халықтың көзі, құлағы, тілі. Ол арқылы ақпарат тарайды, қоғамдық пікір қалыптасады, әділеттілікке шақырылады. Журналист – жай ғана жазушы емес, ол қоғамның айнасы. Оның қаламы – қару, ал қаруы халыққа қызмет етуге бағытталған.

Мен қазақ журналистикасының жұлдыздарына қарап өстім. Шерхан Мұртаза – шындықтың шырақшысы, оның әр сөзі халықтың жүрегіне жетті. Шархан Қазығұл өткір ойымен қоғамдағы кемшілікті ашық айтты. Қайнар Олжай сөздің зергері ретінде мақалаларымен халықты ойландырды. Қали Сәрсенбай ұлттық рухты көтеріп, қазақтың құндылықтарын дәріптеді. Талғат Батырхан, Мейрамбек Төлепберген, Көсемәлі Сәттібайұлы – жас қаламгерлерге үлгі. Осылардай болғым келеді, осылардай халыққа қызмет еткім келеді.

Жалпы қасиетті Тараз өңірінен шыққан белгілі журналистер аз емес. Олардың әрқайсысы жеке бір шеберлік мектебі болуға лайық деп сеніммен айта алам.

Журналист болу – тек мамандық емес, ол – ұлтқа қызмет ету парызы. Журналист халықтың сөзін сөйлейді, ұлттық құндылықтарды дәріптейді, әділеттілікке шақырады. Менің жүрегімде ұлттық рух бар. Ұлттық дәстүрді, салтты, тілді қорғағым келеді. Журналистика арқылы осыны жеткізгімкеледі. Арманым – халқымның сөзін айту, елдің намысын қорғау.

Қазіргі дәстүрлі журналистика үлкен өзгерістерге түсіп жатыр. Ақпарат тарату тәсілдері, аудиторияның сұранысы, жаңа медиа құралдары күн сайын жаңарып келеді. Ендігі кезекте жас журналистер үшін жасанды интеллект қолдану қажеттілікке айналды. ЖИ тек техникалық жағынан көмекші құрал бола алады: деректерді өңдеу, ақпаратты тез табу, мәтінді редакциялау сияқты жұмыстарды жеңілдетеді. Бірақ ең бастысы– мақаланы адам өз ойымен, өз санасымен жазуы тиіс. Журналистің міндеті – халыққа шындықты жеткізу, ұлттық мүддеге қызмет ету. ЖИ – көмекші, ал ой мен жүрек – журналистің басты қаруы.

Мен биыл мектепті аяқтап отырмын. Алдымда үлкен жол тұр. Ұлттық университетке түсуді мақсат еттім. Себебі университетте соңғы заманауи медиа технологияларды игеру мүмкіндігі бар. Бұл – болашақ журналист үшін аса маңызды. Жаңа технологияларды меңгеру арқылы мен өзімнің кәсіби деңгейімді көтеріп, халыққа сапалы ақпарат жеткізе аламын.

Менің ойым қысқа болса да, жүрегімде жалын бар. Журналист болу – арманым. Арманым орындалса, халқым үшін еңбек етемін. Арманым орындалса, қаламыммен елге қызмет етемін. Журналистика – менің өмірлік жолым, ал университетке түсу – сол жолдағы алғашқы үлкен қадамым. Қазір осы жолда ізденіп жүрмін.

Болашақта журналист шеберлігіне баптайтын оқу ордасына түссем, осы саланың нақты маманы болу үшін бар күшімді салатын боламын. Бұл мақсатыма жету үшін жан-жақты ізденіп, әдеби кітаптарды көп оқитын болам. Атам қазақ: «Ізденген жетер мұратқа» деген ғой. Сондықтан мен сөз киесін терең игеріп, қаламымды өмір бойы серік еткім келеді. Бұл асыл арманға қол жеткізетініме сенімдімін.

Дамира Пернебек,
Дарынды балаларға арналған мамандандырылған «Дарын» лицей-интернатының 11 сынып оқушысы
Тараз қаласы,
Жамбыл облысы