Жабылып қалу қаупі бар ма: жекеменшік балабақшалар жаңа талаптарға алаңдап отыр

Қазақстандағы жекеменшік балабақша өкілдері 2027 жылдан енгізілетін лицензиялау талаптары барлық өңірде бірдей қолданылуы керек деп мәлімдеді. Кәсіпкерлер санитарлық, өрт қауіпсіздігі, жер және құрылыс талаптарын алдын ала нақтылауды ұсынып отыр, деп хабарлады «Атамекен» ұлттық кәсіпкерлер палатасы.

Бұған дейін де өңірлердегі жекеменшік балабақшалар лицензиялау тәртібінің нақты тетігі қажет екенін көтерген.

Жекеменшік балабақшалар лицензиялауды алып тастауды сұрап отырған жоқ. Қазақстанның үздіксіз білім беру қауымдастығының төрағасы Лейла Куленованың айтуынша, талаптардың нақты әрі орындауға болатын бірыңғай тізімі және өтпелі кезең болуы қажет.

«Кеше мемлекет жұмыс істеуге рұқсат берген балабақша талап өзгергеннен кейін бүгін лицензия ала алмай қалатын жағдайға жол бермеу керек», – деді ол.

Кездесуде жеке тұрғын үй салуға арналған жер телімдерінде орналасқан балабақшалардың жағдайы да талқыланды. Қауымдастық мәліметінше, жердің нысаналы мақсатын өзгерту қажеттігі әр нысанның орналасқан аумағына, қала құрылысы құжаттарына және жер мен құрылыс талаптарына байланысты. Атыраудағы кәсіпкерлер де бұған дейін осы мәселені көтеріп, кей балабақшалардың жер телімінің нысаналы мақсатын өзгертуге мүмкіндігі жоқ екенін айтқан.

«Атамекен» басқарушы директоры Азамат Бисенбеновтің айтуынша, бір өңірде балабақшаның қолындағы құжаттары жеткілікті болып, екінші өңірде жер телімі немесе ғимараттың нысаналы мақсатын өзгертуді талап ету бірыңғай лицензиялау тәртібіне қайшы келеді.

Кездесу қорытындысында кәсіпкерлер қолданыстағы жекеменшік балабақшаларға қойылатын талаптар жөнінде бірыңғай түсіндірме әзірлеуді, жаңадан ашылатын және бұрыннан жұмыс істеп тұрған балабақшаларға қойылатын талаптарды ажыратуды және кемшіліктерді түзетуге өтпелі кезең беруді ұсынды.

Сондай-ақ балалардың өмірі мен денсаулығына тікелей қауіп болмаса, құжат рәсімдеу аяқталмағаны үшін ғана балабақшаның жұмысын тоқтатпау және оны мемлекеттік білім беру тапсырысынан шығармау ұсынылды.

«Атамекен» бұл ұсыныстарды лицензиялау басталғанға дейін тиісті мемлекеттік органдармен талқылауды жалғастырмақ.