ҰБТ-сыз оқуға түсу мүмкін бе? 2027 жылы жаңа тест енгізіледі

Қазақстанда жоғары оқу орындарына түсу үшін қазіргі ҰБТ-ға балама болатын халықаралық тест түрін енгізу жоспарлануда. Бұл туралы Ғылым және жоғары білім вице-министрі Гүлзат Көбенова мәлімдеді.

Жаңа сынақ жүйесін әзірлеу үшін министрлік әйгілі америкалық ETS компаниясымен бірлесе жұмыс істеуде. Қазіргі уақытта тараптар арасында келіссөздер аяқталып, тиісті меморандумға қол қойылды. Ендігі кезекте жаңа форматты енгізу жұмыстары кезең-кезеңімен жүзеге асырылмақ.

Айта кетерлігі, алдағы 2026 жылы ҰБТ форматында немесе сұрақтар мазмұнында ешқандай өзгерістер болмайды. Ал 2027 жылы жаңа халықаралық тест алғаш рет пилоттық режимде іске қосылады.
Бұл тесттің басты ерекшелігі — ол талапкердің тек мектеп бағдарламасы бойынша білімін ғана емес, сонымен қатар оның өмірлік дағдыларын (soft skills) және логикалық ойлау қабілетін бағалайды. Ең маңыздысы, талапкерлерге таңдау құқығы беріледі: олар өз қалауы бойынша дәстүрлі ҰБТ-ны немесе жаңа халықаралық тестті тапсыра алады. Бұл бастама отандық білім беру жүйесін әлемдік стандарттарға жақындатып, талапкерлердің әлеуетін жан-жақты ашуға мүмкіндік береді деп күтілуде.