Түркістанда дарынды оқушыларды анықтау және олимпиадаға дайындау бойынша мұғалімдер форумы өтті

Түркістан облысында педагогтерге арналған «Дарынды оқушыларды анықтау және олармен білім олимпиадасына дайындалу әдіс-тәсілдері мен стратегиясы» атты ауқымды форум ұйымдастырылды. Іс-шараны Түркістан облысы Білім басқармасы жанындағы «Облыстық дарынды балаларды анықтау және қолдау орталығы» мен Білім-Инновация халықаралық қоғамдық қоры бірлесіп өткізді.

Форумның басты мақсаты – дарынды оқушыларды ерте кезеңде анықтау, оларды жүйелі қолдау және білім олимпиадаларына тиімді дайындау жолдарын талқылау.

Үздік мамандар тәжірибелерімен бөлісті

Форумға еліміздің білім саласындағы беделді мамандары спикер ретінде қатысып, өз тәжірибелерімен бөлісті.

Муаммер Гюль — Гиннес рекордтар кітабына енген ұстаз-математик. Оның шәкірттері облыстық, республикалық және халықаралық білім додаларында жалпы саны 3013 медаль жеңіп алған. Педагог дарынды балалармен жүйелі жұмыс жүргізудің нақты алгоритмдерін ұсынды.

Жігер Тілеуқанов — «Қазақстанның Үздік мұғалімі – National Teacher Prize 2021» жеңімпазы, Global Teacher Prize 2023 номинанты, Qundylyq.kz компаниясының бас директоры. Ол олимпиадалық дайындықтағы мотивация мен заманауи білім беру стратегиялары туралы баяндады.

Ғани Нұрғожаев — “Білім-инновация” халықаралық қоғамдық қорының кәсіби бағдар беру бөлімінің басшысы. Times Higher Education (THE) ұйымы тарапынан аккредиттелген кәсіби бағдар беруші маман. 20-дан астам мемлекетте тәжірибе алмасу бағдарламаларынан өткен педагогика-психология ғылымдарының магистрі дарынды жастарды кәсіби бағытта қолдаудың халықаралық тәжірибесіне тоқталды.

Индира Икапова — Түркістан «Оқушылар сарайының» директоры, Қазақстан Педагогикалық Ғылымдар Академиясының академигі. Ол қосымша білім беру ұйымдарының дарынды оқушыларды дамытудағы рөлін атап өтті.

Еркебұлан Орынбасар — Түркістан «Білім-инновация» лицейінің мұғалімі әрі кәсіби бағдар беруші. Спикер олимпиадалық резерв қалыптастырудың тиімді тәсілдерімен бөлісті.

Форум барысында қатысушылар дарынды оқушылармен жұмыс жасаудың заманауи әдіс-тәсілдерін талқылап, тәжірибе алмасты. Педагогтерге жаңа идеялар ұсынылып, олимпиадалық дайындықтың нақты стратегиялары көрсетілді.

Ұйымдастырушылардың айтуынша, мұндай кездесулер білім сапасын арттыруға және өңірдегі дарынды жастардың әлеуетін дамытуға зор мүмкіндік береді.