Түркістан облысында «Келешек мектептері» ұлттық жобасы аясында 29 мектеп пайдалануға беріледі

Түркістан облысында білім беру инфрақұрылымын дамытуға бағытталған «Келешек мектеп» ұлттық жобасы аясында 29 мектеп қолданысқа енгізілді. Соның бірі – Бәйдібек ауданындағы Шаян ауылында салынған, 300 орындық №1 жалпы білім беретін жаңа мектеп.

Жаңа білім ордасының ашылу салтанатына Нұралхан Көшеров қатысып, тұрғындарды маңызды әлеуметтік нысанның іске қосылуымен құттықтады. Аймақ басшысы өз сөзінде Мемлекет басшысының тапсырмасымен жүзеге асып жатқан ұлттық жоба өңірлердегі білім беру инфрақұрылымын жаңғыртуға, оқушылар үшін қауіпсіз әрі заманауи білім беру ортасын қалыптастыруға бағытталғанын атап өтті. Оның айтуынша, жаңа мектептің ашылуы Бәйдібек ауданында білім сапасын арттырып, ауыл балаларына кең мүмкіндік береді.

Президент бастамасымен елімізде мектеп тапшылығын жою мақсатында «Келешек мектеп» жобасы аясында жалпы саны 217 білім беру ұйымы салынуда. Соның ішінде 23 мың оқушыға арналған 29 мектеп, яғни жобаның 13 пайызы Түркістан облысының үлесіне тиесілі.

Биыл облыста жергілікті бюджет есебінен 17 білім беру нысанының құрылысы жүргізіліп жатыр. Бұдан бөлек, 41 мектепте жаңғырту жұмыстары қолға алынған, олардың 25-інде жөндеу толық аяқталған.

Қазақстандағы шамамен 8 мың мектептің мыңнан астамы немесе 14 пайызы Түркістан облысында орналасқан. Өңір мектептерінде 550 мыңнан астам оқушы білім алады. Тек биылдың өзінде 48 мыңнан астам бала алғаш рет мектеп табалдырығын аттаған.

Сонымен қатар Ордабасы ауданында мемлекетке қайтарылған активтер есебінен салынған Өнер мектебі пайдалануға берілді. Темірлан ауылында ашылған бұл нысан ауданның рухани дамуына серпін беріп, жастардың өнерге деген қызығушылығын арттыруды көздейді. Құрылысқа 870 миллион теңгеден астам қаражат жұмсалып, нысан небәрі сегіз айда бой көтерген.

Өнер мектебі 300 оқушыға арналған. Мұнда музыкалық білім алуға және балалардың шығармашылық қабілетін дамытуға барлық жағдай жасалған. Ғимаратта 150 орындық концерт залы, кітапхана, топтық сабақтарға арналған залдар, ұлттық аспаптарда ойнау, гитара және фортепиано сыныптары бар.

Салтанатты жиында Нұралхан Көшеров тұрғындарды жаңа мектептің ашылуымен құттықтап, мемлекет тарапынан оқушылар мен ұстаздарға көрсетіліп отырған қолдауды атап өтті.

«Жаңа мектептің ашылуымен шын жүректен құттықтаймын! Мұнда сапалы білім алуға барлық жағдай жасалған. Мемлекет тарапынан оқушылар мен ұстаздарға үлкен қолдау көрсетілуде. Президенттің бастамасымен «Келешек мектептері» жобасы аясында республика бойынша 217 оқу орны салынуда, соның 29-ы Түркістан облысында бой көтерді. Жаңа оқу орындарында білім сапасы жоғары деңгейде болуы тиіс. Бұл мәселеде біз білікті педагогтарға үлкен үміт артамыз. Балалар терең білім алып, тәуелсіз Қазақстанды дамытатын азамат болып өссін!» – деді Нұралхан Көшеров.

Бәйдібек аудандық ардагерлер кеңесінің төрағасы Бағдат Қалаубай жергілікті тұрғындар атынан білім саласына көрсетіліп отырған қолдау үшін алғысын білдірді.

Айта кетейік, Шаян ауылындағы мектеп құрылысының жалпы құны 3,5 млрд теңгені құрайды. Жер телімінің аумағы – 2,8 гектар, ғимараттың жалпы ауданы – 5700 шаршы метр. Білім ордасы 300 оқушыға арналған.

Жаңа мектептің іске қосылуы – өңірде білім беру саласын дамытуға бағытталған жүйелі жұмыстың нақты нәтижесі. Түркістан облысының әкімдігі алдағы уақытта да білім беру инфрақұрылымын жетілдіруге және өскелең ұрпақ үшін қолайлы жағдай жасауға басымдық беретінін мәлімдеді.