Тоқаев Оқу-ағарту министрі Жұлдыз Сүлейменованы қабылдады

Мемлекет басшысы Қасым-Жомарт Тоқаев Оқу-ағарту министрі Жұлдыз Сүлейменованы қабылдады. Президентке 2025 жылдың қорытындысы мен биылға арналған міндеттер туралы есеп берілді. Бұл жөнінде Ақорда хабарлады.

Министрдің айтуынша, Жаңа Конституция құндылықтарын ілгерілету мақсатында оқу бағдарламалары мен оқулықтардың мазмұнын жаңарту жұмыстары жүргізіліп жатыр. Сондай-ақ «Таза Қазақстан» бастамасы аясында экологиялық білім беру стандарттары әзірленіп, мектептерде «Адал азамат» біртұтас тәрбие бағдарламасы енгізілуде.

Жұлдыз Сүлейменова бастауыш білім мазмұнына жүйелі талдау жасалғанын айтып, мектеп бағдарламалары оқу, жазу және есептеу дағдыларына басымдық бере отырып қайта қаралып жатқанын жеткізді.

«Келешек мектептері» ұлттық жобасы аясында 460 мың оқушыға арналған 217 мектептің құрылысы аяқталған. Сонымен қатар инфрақұрылымды дамыту мақсатында 184 білім беру нысаны іске қосылған. Үш ауысымды 80 мектеп пен апатты жағдайдағы 31 мектептің мәселесі шешілген. 209 мектепке күрделі жөндеу жүргізіліп, 1192 пәндік кабинет заманауи құрал-жабдықтармен қамтамасыз етілген.

Саланы цифрландыру бағытында да бірқатар жұмыстар атқарылған. Қазіргі таңда мектептердің 99 пайызы интернетке қосылған. «Әлеуметтік әмиян» жобасы 6760 мектепке енгізілген. Дипломдар, аттестаттар мен анықтамалар цифрлық форматқа көшірілген. Ал «Ұстаз» платформасы педагогтерді аттестаттау үдерісін толық автоматтандыруға мүмкіндік береді.

Министрдің мәліметінше, 240 мыңнан астам мұғалім жасанды интеллектіні қолдану бойынша қайта даярлаудан өткен, тағы 200 мың педагог ChatGPT Edu жобасы аясында жасанды интеллект ассистентін пайдалануды үйреніп жатыр. Сонымен қатар балабақша кезегі екі есеге жуық қысқарған.

Кездесу соңында Президент білім сапасын арттыру, оны қолжетімді ету, мектептердегі орын тапшылығын азайту, жұмысшы мамандарды даярлау жүйесін дамыту, бюджет қаржысын тиімді пайдалану және білім беру саласын цифрлық трансформациялау, соның ішінде Qazaq Digital Mektebi жобасын іске асыру бойынша бірқатар міндет жүктеді.

Мемлекет басшысы алдағы үш жылда «Келешек мектептері» жобасының озық тәжірибесін барлық білім беру ұйымдарына енгізу маңызды екенін атап өтті.