Тоқаев NURORDA мектебінің оқушыларын STEM олимпиадасындағы жеңісімен құттықтады

Мемлекет басшысы Қасым-Жомарт Тоқаев Испанияның Барселона қаласында өткен халықаралық STEM олимпиадасында жоғары нәтиже көрсеткен қазақстандық оқушыларға құттықтау жеделхатын жолдады. Президенттің құттықтауы NURORDA мектеп-лицейінің оқушыларына да арналды.

Барселонада өткен жазғы халықаралық додада аталған мектептен 26 оқушы қатысып, жаратылыстану, математика және кодинг бағыттары бойынша сынға түсті. Олимпиадаға 36 елден 900-ден астам оқушы қатысқан.

NURORDA оқушыларының нәтижесі төмендегідей:

• Жаратылыстану пәнінен – 3 алтын, 3 күміс, 8 қола

• Математика пәнінен – 5 алтын, 3 күміс, 13 қола

• Кодинг бағыты бойынша – 1 алтын, 1 қола

Айрықша атап өтерлігі, 8-сынып оқушысы Асығат Дүйсенов жаратылыстану пәні бойынша абсолютті жеңімпаз атанды.

Президент STEM олимпиадасымен қатар, Біріккен Араб Әмірліктерінде өткен халықаралық химия олимпиадасында жеңіске жеткен оқушыларды да ерекше атап өтті.

– Бұл – Қазақстанда білім беру саласы қарқынды дамып келе жатқанының айқын дәлелі. Мемлекет жастардың сапалы білім, тағылымды тәрбие алуына әрдайым баса мән береді. Еліміз сіздерді мақтан тұтады. Жарқын жеңістеріңіз көп болсын! – делінген Мемлекет басшысының құттықтау хатында.

Президент мұндай жетістіктерді еліміздің абырой-беделін арттыра түсетін тарихи оқиға деп бағалады.