Тоқаев мұғалімдердің арыз-шағымынан кейін маңызды тапсырма берді

Қазақстанда педагогтерді аттестациялауға қойылатын талаптар қайта қаралады. Бұл туралы Мемлекет басшысы Қасым-Жомарт Тоқаев Астанада өткен республикалық педагогтердің Тамыз конференциясында мәлімдеді.

Президенттің айтуынша, қазіргі қолданыстағы аттестациялау ережелеріне қатысты мұғалімдерден көптеген арыз-шағымдар түсуде. Мемлекет басшысы мұғалімдердің біліктілігін бағалаудан бас тарту жоспарланбайтынын, бірақ жүйені барынша түсінікті әрі ашық ету қажет екенін баса айтты.

«Мен педагогтерді аттестациялау талаптарын оңтайландыру және жетілдіру жөнінде нақты тапсырма бердім. Бұл жерде бағалаудан толық бас тарту немесе оны одан әрі күрделендіру туралы сөз болып отырған жоқ. Білімді әділ бағалау - білім беру жүйесінің негізі. Бізге барынша түсінікті әрі ашық жүйе қажет», - деді Қасым-Жомарт Тоқаев.

Енді жауапты профильді министрлік бұл мәселені жан-жақты пысықтап, жақын арада өз ұсыныстарын білдіруі тиіс.

Конференция барысында Президент болашақ мұғалімдерді даярлау мәселесіне де тоқталды. Қазіргі уақытта педагогтерді тікелей мектептер мен балабақшалардағы жұмысқа сапалы дайындауға мүмкіндік беретін біртұтас жүйе құру талқыланып жатыр. Мемлекет басшысы мұндай өзгерістерді енгізгенге дейін олардың тиімділігін мұқият бағалауға шақырды.

«Реформа - бұл алғашқы сынақ немесе эксперимент емес. Бұл — жауапты шешім және шаралар кешені. Үкімет педагогикалық жоғары оқу орындарының қызметін қайта қарау кезінде бұл мәселені міндетті түрде ескеруі тиіс», - деп атап өтті ол.

Педагогтердің біліктілігі қалай арттырылады

Мемлекет басшысы «Өрлеу» біліктілікті арттыру орталығының қызметіне жеке тоқталып, оның қазіргі жұмысын сыни тұрғыдан бағалады.

«Өздеріңізге белгілі, мұғалімдерге кәсіби қолдау көрсету үшін «Өрлеу» біліктілікті арттыру орталығы құрылған болатын. Бұған қарамастан, бүгінде бұл ұйымның жұмысын қанағаттанарлық деп айту қиын», - деді Президент.

Оның айтуынша, жаңа буын педагогтерін даярлауға тек профильді ведомстволар ғана емес, сонымен бірге әдістемелік орталықтар, мектепке дейінгі, орта және қосымша білім беру мекемелері де белсенді қатысуы қажет.

Сонымен қатар Қасым-Жомарт Тоқаев біліктілікті арттыру бағдарламаларына жаңа Конституция құндылықтарын, «Заң мен тәртіп» қағидаттарын, сондай-ақ «Адал азамат» және «Таза Қазақстан» идеяларын енгізуді тапсырды.