Тоқаев мұғалімдерді алдағы Ұстаздар күнімен құттықтады

Мемлекет басшысы Қасым-Жомарт Тоқаев ұстаздар қауымын кәсіби мерекемен құттықтап, олардың қоғамдағы орны мен еңбегіне ерекше құрмет білдірді.

Президент сөзінде Міржақып Дулатұлының «Халыққа ең пайдалы адам – мұғалім» деген қанатты сөзін еске алып, ұстаздың әр азаматтың өмірінде алар орнын атап өтті.

"Мұғалім – әр балаға жол көрсетуші тұлға. Ұстаз – тәлім-тәрбие мен білімнің қайнар көзі. Қоғамның өркениеттілігі ұстазға деген құрметпен өлшенеді. Сондықтан бүгін мен білім беру саласында еңбек етіп жүрген барша азаматқа шынайы ризашылығымды білдіремін – деді Қасым-Жомарт Тоқаев.

Президент білім беру саласына жасалып жатқан қолдауларға да тоқталды. Оның айтуынша, соңғы бес жылда білім саласына бөлінген қаржы үш есе артқан. Елде 1200 жаңа мектеп ашылып, «Келешек мектептері» ұлттық жобасы аясында 150 білім ошағы салынды. Қазіргі таңда тағы 67 мектептің құрылысы жүріп жатыр.

"Балалардың сапалы білім алуына қажетті барлық жағдай жасалуда. Бұл деректі халық білуі керек, себебі мемлекет жас ұрпақтың біліміне және ұстаздардың жағдайына баса назар аударып жатыр. Біз педагогтердің мәртебесін көтеріп, әлеуметтік жағдайын жақсарту үшін нақты шараларды қолға алдық. Арнайы заң қабылдадық. Бүгінде ұстаздардың жалақысы 2 есе өсті", – деді Мемлекет басшысы.