Тоқаев мектептерге жасанды интеллект енгізу туралы жарлыққа қол қойды

Қасым-Жомарт Тоқаев «Қазақстан Республикасының орта білім беру жүйесіне жасанды интеллектіні ендіру жөніндегі шаралар туралы» жарлыққа қол қойды.

Құжаттың негізгі мақсаты – жасанды интеллект қарқынды дамып жатқан кезеңде елдің дамуына ықпал ететін заманауи әрі инновациялық білім беру жүйесін қалыптастыру. Жарлықта адами капиталды дамытуға басымдық берілген.

Құжатқа сәйкес, Қазақстан Үкіметі 2026 жылғы 1 шілдеге дейін орта білім беру жүйесіне жасанды интеллект енгізудің 2026–2029 жылдарға арналған кешенді жоспарын бекітуі тиіс. Жоспарда дербес оқыту тетіктері, цифрлық инфрақұрылым, мұғалімдерді даярлау және оқушылардың жеке деректерін қорғау мәселелері қамтылады.

Сондай-ақ Үкімет 2026 жылғы 1 маусымға дейін қала мен ауыл мектептері арасындағы білім сапасы айырмасын азайтуға бағытталған пилоттық жобаны іске қосуы қажет. Жоба аясында мектептер жоғары жылдамдықтағы интернетпен және техникалық құралдармен жабдықталады.

Жарлықта Ли Кай-Фу ұсынған тәсілдерді пайдалану да қарастырылған. Сонымен қатар 2026 жылғы 1 қыркүйекке дейін мектептерде жасанды интеллект қолдану стандарттары бекітіледі.

Құжатқа сәйкес, жасанды интеллект мұғалімдерді алмастыру үшін емес, олардың жұмысын тиімді ететін қосымша құрал ретінде пайдаланылмақ. Осы бағыттағы арнайы шаралар жоспары да 2026 жылғы 1 қыркүйекке дейін әзірленеді.