Стэнфорд профессорлары Қазақстанның ірі компания басшыларына ЖИ үйретуде

Қазақстан Республикасының Жасанды интеллект және цифрлық даму министрлігі Stanford University HAI, OpenAI Academy және Silkroad Innovation Hub-пен бірлесіп, «AI Leaders 2026» ауқымды білім беру жобасын іске қосты. Бағдарлама шеңберінде еліміз бен өңірдегі 150-ден астам ұйымның топ-менеджерлері жасанды интеллектті басқару мен енгізу дағдыларын меңгереді.

8 сәуірде басталған оқу курсы Stanford университетінің академиялық іргетасы мен OpenAI компаниясының практикалық технологияларын біріктіреді. Оқыту процесі онлайн форматта өтіп, қатысушыларға қазақ, өзбек және орыс тілдеріндегі ілеспе аударма қызметі ұсынылған. Бағдарламаның академиялық жетекшісі — әлемге әйгілі ғалым Питер Норвиг.

Жобаға Қазақстанның ірі мемлекеттік холдингтері мен жекеменшік компанияларының бірінші басшылары қатысуда. Олардың қатарында:

• Мемлекеттік сектор: «Самұрық-Қазына» ҰӘҚ, «Бәйтерек» холдингі, ҚР Ұлттық Банкі.

• Қаржы және технология: Halyk Bank, Freedom Holding, Kaspi.kz, Beeline, Kcell.

• Өндіріс және құрылыс: BI Group, Astana Motors, «Казцинк».

Сонымен қатар бағдарламаға Әзербайжан, Өзбекстан, Қырғызстан, Тәжікстан, Моңғолия, Түркия және Қатар сияқты аймақтық серіктес елдердің өкілдері қосылды.

Курс соңында әрбір қатысушы өз ұйымының ерекшелігіне негізделген қолданбалы ЖИ-стратегиясын әзірлейді.

«Бұл бағдарлама цифрлық трансформация экономиканың негізгі драйверіне айналатын басқарудың жаңа моделіне жол ашады», — деп атап өтті Премьер-Министрдің орынбасары – Жасанды интеллект және цифрлық даму министрі Жасұлан Мәдиев.

Оқуды сәтті аяқтаған басшылар Stanford HAI сертификаттарын иеленіп, өңірлік AI-көшбасшылар қоғамдастығының мүшесі атанады. Бұл бастама Қазақстанның әлемдік білім деңгейі бойынша топ-20 елдің қатарына ену стратегиясымен тығыз байланысты.