Шығыс Қазақстан облысында мұғалімдердің кәсіби біліктілігін арттыру және оларға қолайлы жағдай жасау жұмыстары жүйелі түрде жүргізілуде

Елімізде жыл сайын дәстүрлі түрде атап өтілетін педагогтердің кәсіби мерекесі қарсаңында Шығыс Қазақстан облысында білім беру саласының сапалық көрсеткіштерін арттыру мен ұстаздар қауымына қолайлы еңбек жағдайларын қалыптастыру бағытындағы кешенді жұмыстар қорытындыланды, деп хабарлайды Шығыс Қазақстан облысының әкімдігі баспасөз қызметі. Мұғалімнің күнделікті қызметі тек оқу бағдарламасына сәйкес сабақ берумен ғана шектелмей, әрбір оқушының жеке интеллектуалдық қабілетін айқындауға, оның ішкі әлеуеті мен білімге деген ынтасын арттыруға бағытталған. Осыған байланысты, аймақ басшысы Нұрымбет Сақтағановтың арнайы тапсырмасына сәйкес, өңірде педагогтердің кәсіби даярлығын жетілдіруге және олардың тиімді жұмыс істеуіне қажетті жағдайларды жасауға басымдық беріліп келеді.

Қазіргі заманғы білім беру кеңістігінде тек терең академиялық білімі бар мамандар ғана емес, сонымен бірге оқытудың озық технологияларын меңгерген, цифрлық ресурстарды эргономикалық тұрғыда қолдана алатын кәсіби кадрларға деген сұраныс жоғары. Осы жүктелген міндеттерді орындау мақсатында Шығыс Қазақстан облысында педагогтерді әлеуметтік және кәсіби тұрғыдан қолдау, ауылдық жерлердегі білім беру мекемелеріне білікті мамандарды тарту, олардың біліктілік деңгейін үздіксіз арттыру және мектептердің заманауи материалық-техникалық базасын қалыптастыру шаралары жүйелі түрде жүзеге асырылуда.

Ауылдық елді мекендерге жас мамандарды тарту және әлеуметтік қолдау

Ауылдық аймақтардағы білім беру ұйымдарын сапалы кадрлық құраммен қамтамасыз ету – өңірлік саясаттың негізгі бағыттарының бірі болып табылады. Бұл орайда «Дипломмен – ауылға!» мемлекеттік бағдарламасының аясында нақты қолдау шаралары көрсетілуде. Мемлекеттік бағдарлама шеңберінде ауылдық жерлердегі білім беру мекемелеріне жұмысқа орналасқан жас педагогтерге және сұранысқа ие өзге де мамандарға 100 айлық есептік көрсеткіш (АЕК) мөлшерінде біржолғы көтерме жәрдемақы төленеді.

Бұдан бөлек, жас мамандардың тұрғын үй жағдайын жақсарту мақсатында баспана сатып алуға немесе оның құрылысын жүргізуге 1 500 АЕК-ке дейінгі көлемде жеңілдетілген бюджеттік несие қарастырылған. Бұл қаржылай қолдау 15 жыл мерзімге жылдық 0,01 пайыздық төмендетілген мөлшерлемемен беріледі. Мұндай мемлекеттік қолдау тетіктері мамандарды ауылға уақытша тартуды ғана емес, олардың тұрақты қоныстанып, кәсіби тұрғыда ұзақ мерзімді дамуына жағдай жасауды көздейді.

Инфрақұрылымдық жаңғырту және заманауи мектептер құрылысы

Мұғалімнің кәсіби әлеуеті мен оқыту шеберлігін толық ашу үшін оның еңбек ететін ортасы заманауи талаптарға сай жабдықталуы тиіс. Ағымдағы жылы облыс аймағындағы 25 орта мектепте 35 заманауи пәндік кабинет пайдалануға берілді. Арнайы құрал-жабдықтармен қамтамасыз етілген бұл кабинеттер мұғалімдерге сабақ барысында зертханалық, практиклық жұмыстарды жоғары деңгейде ұйымдастыруға және интерактивті оқыту әдістерін кеңінен қолдануға мүмкіндік береді.

Сонымен қатар, бұл бағыттағы ауқымды жұмыстар жаңа білім беру нысандарының құрылысы арқылы да өз жалғасын табуда. «Келешек мектептері» ұлттық жобасын жүзеге асыру аясында Шығыс Қазақстан облысында жалпы сыйымдылығы 3 мың оқушыға арналған 7 жаңа заманауи мектеп пайдалануға берілді. Аталған білім беру нысандарының үшеуі Өскемен қаласында, біреуі Риддер шаһарында, екеуі Глубокое ауданында және біреуі Шемонаиха ауданында бой көтерді.

Педагогтердің біліктілігін арттыру және инклюзивті білім беру

Қазіргі білім беру сапасын арттыру процесінде педагогтің дипломымен шектеліп қалмай, білімін үнемі толықтырып отыруы аса маңызды. Оқыту әдістемелері мен педагогикалық технологиялардың жедел жаңаруына байланысты мұғалімдердің кәсіби біліктілігін үздіксіз жетілдіру басты орынға шығады. 2026 жылдың соңына дейін облыс бойынша 3 мыңнан астам педагогті арнайы біліктілікті арттыру курстарымен қамту жоспарланған. Ағымдағы жылдың 1 қазанындағы мәліметке сәйкес, бұл курстардан 2 245 мұғалім сәтті өтіп, тиісті сертификаттарға ие болды. Бұл шаралар мұғалімдердің оқу процесіне жаңа әдістемелік тәсілдерді енгізуіне тікелей ықпал етеді.

Сонымен бірге барлық оқушыларға тең мүмкіндіктер беру қағидатына сәйкес, ерекше білім беру қажеттіліктері бар балалармен жұмыс істейтін педагогтердің кәсіби даярлығына ерекше назар аударылуда. 2026 жылы осы бағыт бойынша 500 педагог мамандандырылған оқыту курстарынан өтті. Оқу барысында мұғалімдер ерекше қажеттіліктері бар балаларға арналған бейімделген оқу бағдарламаларын әзірлеуді, психологиялық-педагогикалық қолдау көрсетуді және инклюзивті білім берудің заманауи методикаларын меңгерді.

Жүргізіліп жатқан осы кешенді жұмыстардың түпкі мақсаты – өңірдегі әрбір оқушының сапалы білім алуына жағдай жасайтын мұғалімдердің кәсіби құзыреттілігін арттыру және білім беру жүйесін жаңа деңгейге көтеру болып табылады.