Шетелдік ұстаз – 2 МЛН, ал жергілікті мұғалім – небәрі 500 МЫҢ!

«Назарбаев Зияткерлік мектептері» дербес білім беру ұйымында (НЗМ) шетелдік педагогтардың орташа айлық жалақысы қазақстандық мұғалімдерден 4,5 есе жоғары. Бұл туралы Жоғарғы аудиторлық палата Үкіметтің 2024 жылға арналған республикалық бюджеттің орындалуы туралы есебіне жасаған қорытындысында мәлімдеді.

Атап айтқанда, 2023 жылы НЗМ-де отандық мұғалімдердің орташа жалақысы 508,1 мың теңгені құраса, шетелдік мамандар 2 миллион 281,5 мың теңге алған. Сонымен қатар, шетелдік педагогтарға әлеуметтік пакет ұсынылған. Оның ішінде көшіп келу шығындары, тұрғын үй ақысы, авиабилеттер мен басқа да қосымша төлемдер бар.

Сонымен қатар, соңғы 5 жылда НЗМ-де жұмыс істеу үшін 643 шетелдік мұғалім тартылған. Осы уақыт аралығында оларға жұмсалған қаржы 17 миллиард теңгеден асқан.

Бұған қоса, есепте ақылы бөлімде оқитын оқушылардың ата-аналарына түсетін жүктемені азайту үшін мемлекеттен 162 миллион теңге бөлінгеніне қарамастан, оқу ақысы арзандатылмағаны сынға алынған.