Шәкіртақы тағы да өсе ме? Саясат Нұрбек жауап берді

Қазақстанның Ғылым және жоғары білім министрлігі студенттердің шәкіртақысын көбейту мәселесін қайта қарастырып жатыр. Алайда, түпкілікті шешім әлі қабылданған жоқ. Бұл туралы Үкімет брифингінде ведомство басшысы Саясат Нұрбек мәлімдеді.

Министрдің айтуынша, соңғы бес жыл бойы шәкіртақы мөлшері кезең-кезеңімен жыл сайын 20–25%-ға өсіп келген. 2025 жылы бұл бағдарлама өз мәресіне жетті.

«Қазір біз осы процесті қайта жандандыру үшін кеңесіп жатырмыз. Мақсатымыз - келесі бесжылдық циклде де шәкіртақыны тұрақты түрде өсіріп отыру. Бірақ бұл бойынша нақты шешім әлі шыққан жоқ», - деді Саясат Нұрбек.

Бүгінгі таңда ең қомақты төлем PhD докторанттарға тиесілі - олар айына шамамен 254 мың теңге алады. Министрлік бұл соманы алдағы уақытта тағы да арттыруды жоспарлап отыр. Сондай-ақ, педагогикалық мамандықтарда оқитын студенттердің де төлемдері айтарлықтай өскенін еске салды.

Студенттерді толғандыратын тағы бір мәселе - оқу құны. Мемлекеттік жоғары оқу орындарында баға қатаң бақылауда болады. Инфляцияға байланысты түзетулер 10%-дан аспауы тиіс. Министр биыл да бағаның күрт өсуіне жол берілмейтінін, жоғары оқу орындарымен арнайы консультациялар жүргізілетінін жеткізді.