Риддерде 600 орындық заманауи мектеп пайдалануға берілді

Өндірісті Риддер қаласының 5-ші шағын ауданында мемлекеттік тілде білім беретін, 600 оқушыға шақталған су жаңа мектептің салтанатты ашылу рәсімі өтті. «Казцинк» ЖШС-нің жеке инвестициясы есебінен бой көтерген бұл заманауи білім ошағының ашылуына Шығыс Қазақстан облысының әкімі Нұрымбет Сақтағанов арнайы қатысып, жергілікті тұрғындардың қуанышымен бөлісті, деп хабарлайды Шығыс Қазақстан облысы әкімдігінің баспасөз қызметі.

Аумағы 10 мың шаршы метрден асатын, үш бөлек блоктан тұратын еңселі ғимарат қауіпсіздік пен жайлылықтың ең озық халықаралық талаптарына толығымен сай келеді. Салтанатты жиында сөз алған өңір басшысы биыл облыс бойынша 10 мыңға жуық бүлдіршіннің мектепке қадам басқанын, оның 60-тан астамы дәл осы жаңа «Шаңырақ» мектеп-гимназиясының табалдырығын аттағанын жеткізді. Сонымен қатар, аймақ басшысы жаңа оқу жылында шекаралық Марқакөл, жаңадан құрылған Самар аудандары мен Риддер қаласында бірдей үш бірдей жаңа білім ошағының ашылғанын зор мақтанышпен атап өтті.

Ауқымды ғимараттың ішкі инфрақұрылымы оқушылардың сапалы білім алуы мен шығармашылық тұрғыда жан-жақты дамуына толықтай бағытталған. Жоғарғы сыныптарға арналған кең әрі жарық оқу бөлмелері, мамандандырылған шеберханалар, заманауи кітапхана мен ресурс орталығы жабдықталған. Ал бастауыш сынып оқушылары үшін барлық қауіпсіздік шаралары ескерілген жеке оқшауланған аймақ қарастырылған.

Оған қоса, білім ордасында үлкен және кіші спорт залдары, 135 орындық кең акт залы, толыққанды медициналық блок, логопед пен психологтың арнайы кабинеттері орналасқан. Балалардың дұрыс тамақтануына да ерекше көңіл бөлініп, асхана соңғы үлгідегі құрылғылармен қамтамасыз етілген. Ал мектеп ауласында футбол, волейбол, баскетбол алаңдары, 250 метрлік кәсіби жүгіру жолағы және демалыс аймақтары бар заманауи спорттық-ойын кешені бой көтерді. Жаңа білім ошағы қаланың оқу инфрақұрылымын жаңа деңгейге көтеріп, өскелең ұрпаққа сапалы білім беруге зор серпін береді.