QS 2026 рейтингі жарияланды: Қазақстандық қай университет әлемдік үздіктер қатарында бар?

Қазақстандық жоғары оқу орындары QS World University Rankings by Subject 2026 әлемдегі үздік университеттердің пәндік рейтингінде өз көрсеткіштерін айтарлықтай жақсартты.

QS пәндік рейтингтері — бөлек мемлекеттер мен аумақтардағы 1900 университетте іске асырылатын 21 000-нан астам білім беру бағдарламасына жасалған тәуелсіз салыстырмалы талдау. Рейтинг 55 пәнді қамтиды және олар бес ірі салаға біріктірілген: «Өнер және гуманитарлық ғылымдар», «Инженерлік ғылымдар және технологиялар», «Өмір туралы ғылымдар және медицина», «Жаратылыстану ғылымдар», сондай-ақ «Қоғамдық ғылымдар және басқару».

Пәндік рейтингтердегі позициялар саны бойынша еліміздегі жоғары оқу орындарының арасында Әл-Фараби атындағы Қазақ ұлттық университеті (ҚазҰУ) көш бастады. Оқу орны 4 салалық және 23 пәндік рейтингке енді. Одан кейінгі орында бір салалық және 15 пәндік рейтингте ұсынылған Л.Н. Гумилев атындағы Еуразия ұлттық университеті (ЕҰУ) тұр. Сонымен қатар, Қазақ ұлттық аграрлық зерттеу университеті (ҚазҰАЗУ), Құрманғазы атындағы Қазақ ұлттық консерваториясы және Абай атындағы Қазақ ұлттық педагогикалық университеті өздерінің бейіндік бағыттары бойынша жетекші орындарға ие болды.

QS өкілдері қазақстандық ЖОО-лар халықаралық аренадағы ықпалын күшейтіп, пәндік рейтингтердегі қатысу аясын кеңейтіп жатқанын атап өтті. Бұл туралы QS аға вице-президенті Бен Саутер мәлімдеді:

«2026 жылғы әлемнің үздік университеттерінің пәндік рейтингі Қазақстанның жоғары білім беру жүйесі өзінің бәсекеге қабілеттілігін арттырып жатқанын көрсетеді. Жаңа пәндер бойынша 14 білім беру бағдарламасының дебют жасауы - елдің аймақтық білім беру орталығы ретіндегі халықаралық беделінің өскенін дәлелдейді. Сондай-ақ, Қазақстан ЖОО-лары «Білім беру және оқыту» және «Лингвистика» бағыттары бойынша көрсеткіштерін жақсартып, «Орындаушылық өнер» бойынша алғаш рет топ-100 қатарына енді».

QS өңірлік директоры Сергей Христолюбов Қазақстанның Орталық Азиядағы көшбасшылық орнын сақтап қалғанын және үздік 100-дікке енген жалғыз ел екенін жеткізді:

«Абай атындағы ҚазҰПУ-дың «Білім беру және оқыту» бағыты бойынша әлемдік топ-50 қатарына енуі — өңірдегі жоғары білім тарихындағы ең жоғары көрсеткіш әрі ұлттық жүйенің зор жетістігі. Қазақстанның пәндік рейтингтердегі өкілдігі 13 ЖОО-ға дейін өсті. Олар 4 ірі сала мен 27 пән бойынша 70 позицияда ұсынылған, бұл — ел үшін рекордтық көрсеткіш».

Осылайша, QS World University Rankings by Subject 2026 қорытындысы қазақстандық университеттердің әлемдік білім беру кеңістігіндегі рөлінің нығайғанын растайды. Қатысушы ЖОО-лар санының артуы мен жекелеген пәндердегі жетістіктер ұлттық білім беру жүйесінің бәсекеге қабілеттілігін және Қазақстанның Орталық Азиядағы жетекші академиялық орталық ретіндегі мәртебесін айқындай түседі.