Павлодарлық оқушылар Халықаралық Жәутіков олимпиадасында топ жарды

10-15 қаңтар аралығында Алматы қаласында физика-математика және информатика пәндері бойынша өткен мерейтойлық ХХІI Халықаралық Жәутіков олимпиадасы (IZhO 2026) өз мәресіне жетті. 20 жылдан бері дәстүрлі түрде ұйымдастырылып келе жатқан беделді білім додасында павлодарлық өрендер жоғары дайындықтарын көрсетіп, олжалы қайтты.

Биылғы олимпиадаға әлемнің 16 елінен (соның ішінде Үндістан, Индонезия, Румыния, Болгария, Түркия және ТМД мемлекеттері бар) 612 ең үздік оқушы қатысты. Оқу-ағарту министрлігінің қолдауымен өткен бұл шараның басты мақсаты - жас таланттарды анықтап, ІТ мен физика-математика саласындағы халықаралық ынтымақтастықты нығайту.

Өңір намысын облыстық және республикалық кезеңдерде іріктелген 15 оқушы қорғады. Олардың қатарында №8 мектеп-лицейінің, «Білім-Инновация» лицейлерінің және «Жас дарын» мектебінің тәрбиеленушілері бар. Сонымен қатар Юрий Шубладзе Қазақстанның ұлттық құрама командасы сапында өнер көрсетті.

Физика пәнінен үздік нәтиже көрсеткен «Білім-Инновация» лицейінің 10-сынып оқушысы Қайырбек Исмаил алтын медальға ие болды. Ол сондай-ақ Satbayev University оқу орнының тегін білім беру грантын жеңіп алды. Жас дарынның ғылыми жетекшісі – Ерасыл Дулатұлы.

Ал математика пәні бойынша Қазақстанның ұлттық құрама командасының мүшесі, №8 мектеп-лицейінің оқушысы Юрий Шубладзе күміс медаль еншіледі. Физика пәнінен осы білім ордасының тағы бір шәкірті Камила Сагиденова да күміс жүлдеге қол жеткізді. Оқушыларды байқауға дайындаған ұстаздары – Л.В. Стадникова мен А.Н. Захаров.