Павел Дуров қазақстандық ауыл оқушыларымен кездесті

Telegram мессенджерінің негізін қалаған Павел Дуров Қазақстанның шалғай ауылдарынан жиналған 500 оқушымен кездесті. Ол IQanat білім беру жобасы аясында арнайы мектепке келіп, балалармен емен-жарқын әңгімелесті.

«Сенім мен білім бар жерде бәрі мүмкін» деген ол жастарға оқуға күш салу керегін айтты.

Кездесу барысында Павел Дуров өзінің мектептегі жылдары, бағдарламалаудағы алғашқы тәжірибесі жайлы айтып берді. Сондай-ақ жасанды интеллекттің даму перспективаларына тоқталып, болашақтағы басты трендтердің бірі ретінде биотехнологияны атады.

Айта кетейік, бір жыл бұрын Дуров Қазақстан ауылдарынан іріктелген 12 дарынды баланың IQanat мектебінде оқуына 350 мың доллардан астам қаржы бөлген болатын. Бұл қаражат олардың оқу, тұру, тамақ және өзге шығындарын өтеуге жеткілікті болды.

Оқушылардың арасында олимпиадалар мен хакатондарда жеңіске жеткендер бар. Олардың бірі – Ақмола облысының Бұлақсай ауылынан шыққан 15 жастағы Тимур Хозаев.

"Біздің ауылдағы мектепте бар-жоғы үш оқушы болды. Өсуге мүмкіндік аз еді. Павел Дуровтың қолдауымен IQanat мектебіне түсіп, енді IT саласында маман болуға жол ашылды", – деді.

IQanat – ауыл балаларына жаңа мүмкіндіктер ашуға бағытталған жоба. 230-дан астам кәсіпкердің бастамасымен жүзеге асып жатқан бағдарлама түлектерінің 94%-ы қазір Қазақстан мен шетелдің жетекші университеттеріне грантпен оқуға түскен. Олар бүгінде әлемнің 19 елінде білім алып жүр.

2024 жылдан бері Павел Дуров жоба қамқоршыларының қатарына қосылған.